Tỉnh Sơn La txos nhiv no tưz cxax tâu muôx 380 cxênhz côngz yuôx vắc xin phax moz Covid-19, tax tâu cxax iz côngz yuôx trâu pêx xênhv txix 18 shông tror sâur zos 300 cxênhz ntâu lênhx nênhs, bâuv li zuôr xar 35%; côngz oz xar muôx 10%. Zơưv Lê Trung Tâm, Chủ tịch UBND huyện Mộc Châu puz pâuz, chiê côngz xưv cxax yuôx vắc xin phax moz Covid-19 tâu kriz uô taz por huv zos li tsưr ziv thiêz ngaz tuk cxax yuôx, Ban chox kriê phax, tar caz moz Covid-19 huyện tưz tso tơưv tsưr ziv cxax cov huv đros, sâu chênhz zênhv thiêz kriz đar jux juk qơư cxax yuôx hâur yênhx jiês cxax. Nhiv no, huyện tưz kriz đar ndê muôx 17 qơư cxax ntơưv chor xar, thị trấn, paz trâu pêx xênhv tsik tsuv muk lok ntâu, txo grêk tsơưs muôx chôngz nênhs nhoz trâu ntơưv iz kror qơư, côngz xưv tsưr tsix cxax yuôx cux tâu kriz uô sêi thiêz ngaz tuk đuô:“Nhiv no huyện Mộc Châu tsênhv kriz uô cxax yuôx 3 cấp cxax yuôx phax moz txix tỉnh li chor jiês cxax yuôx vắc xin. Huyện cux xav jênhv sir jos cxax yuôx cov đêz đar sâuv thax tsav chiê paz thơưz huôv tsar kinh têr-xar hôiv; oz thiêz Mộc Châu zos huyện du lịch, viv li, hax zav tsuv sir jos cxax yuôx trâu tas nro pêx xênhv chiê taz por Mộc Châu zos qơư tuôx ngaz tuk trâu tsôngv kruô”./.

(Thu Thùy-Lik Thox cxêik nhênhv)

Jok Lĩnh nhoz trơưk 2 saz txox cêr lox sôr 12, hâur tsênhv qơư xã Mường Pồn-iz xã nhoz ntus đriv hâur huyện Điện Biên, tỉnh Điện Biên, muôx zuôr xar 20 cêik cêr đriv têz buôk têz qơưk Lol Tsuôk. Têx shông thâuv ntêx, xã Mường Pồn heik cxuô, jok Lĩnh heik taz khênhr muôx têx txuz nav ntor luôx jôngr ntông uô liêx têz, muk lol đhâu đriv têz tsi trơưk chei, siz zâuv uô vax tsưr tsi trơưk chei têz qơưk, nhiês zuôr muôs uô luôv zax zênhz, muôx tuz saz tuz nhiês….. Trung úy Lò Văn Bích, Công an xã Mường Pồ, huyện Điện Biên heik pâuz: Txix thâuv phôngz yaox tas nro tsôngv pêx xênhv sơưr đơưk sik đros tsưx phưv têz qơưk tâu phuôx tôngv thiêz fuô uô đêz đar, zos Bí thư Chi bộ jok Lường Văn Bình seiz car thiêz tso nênhs lês uô têx hâux lưv qênhz shuôs, qênhz yuôx, hâur thax tsav nhiv no sơưr đơưk luz nênhx tưz hlôngr yiêz ntâu thiêz nox nhoz njiês to, tsi pov muôx têx cuz nxor li heik sâuv:“Txix thâuv muôx tổ txiv ngaz seiz car jêx jok, lơưr tưz sir jos đros công an xã lês uô jông têx hâux lưv zok muôz, viv li têx nênhs fêv uô tuz saz tuz nhiês li uz li no hâur jok Lĩnh tưz txo grêk tsơưs ntâu, sơưr đơưk uô nênhx truôx tuk, tso siêz huôv tsar uô nox uô hnar lơưv”./.

 (Vũ Lợi-Riê Lâux cxeik, nhênhv)

Tỉnh Lai Châu nhiv kruôr pov muôx nzir 2 lênhx nênhs txix tỉnh Bình Dương tror lok trâus moz Sát-Covi-2. Lơưr nriêr pâuz, têis cik 14/10/2021. Oz lênhx nênhs moz no đros zuk tuk txir chêix yêz mêir txix Bình Dương lok Lai Châu đros iz paz nênhs muôx 32 lênhx nênhs. Thâuv lok txos ntơưv Đồng Nai, chor nênhs no tâu lưx lươngv muôx vax huôv xuôk yêz ô tô thâux xa lok txos ntơưv Hà Nội. Đhâu co, đoanx tror chêix yêz mêir lok trâu tỉnh Phú Thọ, tâu Công an tỉnh Phú thọ xuôk yêz ô tô thâux txos trâu qơư sêiz jor qênhz yuôx caz moz Covid-19 tỉnh Yên Bái. Đhâu thâuv txêik tok tâu, lưx lương muôx vax huôv tỉnh Lai Châu tưz chox chor nênhs no lok ntơưv qơư cêv kuôk tsêx trung Tsêr cơưv Quân sự tỉnh Lai Châu thiêz tâu njuôk shuôk tsik pov trâus cik caz moz Sát-Covi-2. Txos hnuz 23/10, chor nênhs no tror tâu njuôk shuôk caz moz jiês oz mak pov oz lênhx nênhs no trâus moz Sát-Covi-2 thiêz nhiv no tas nro oz lênhx nênhs no tưz tâu chox muk trâu tsêr kho moz njưl tỉnh Lai Châu chiê chơưv kho moz./.

(Khắc Kiên-Lik Thox cxêik nhênhv)

Cơ quan Cảnh sát qênhz yuôx, Công an huyện Phù Yên, tỉnh Sơn La nhiv kruôr tso tơưv Quyết tinhv tik cêr cxâuv trâu Hà Minh Phú, nhoz ntơưv jok Sọc, xã Mường Bang, huyện Phù Yên, tỉnh Sơn La lok sâuv “nziêk đas luôs lưv tus têx nhiêx txiêx nox”.

Uô ntêx ntơư, liv zôngv thâuv tsôngv pêx xênhv xar muôx ntơưr tsar yêz, Hà Minh Phú tưz heik trâu hâur mạng xã hội tiêk, Phú uô muôs têx ntơưr tsar yêz meir thiêz ntơưr tsar yêz lox hov B1, B2, C, D, E muôs, zos lênhx tưs xar zuôr txos mak xa têx đuôz thiêz ntơưr chứng minh nhân dân lok sik ntơưr căn cước công dân trâu Phú, tsuôk đhâu 7-10 hnuz xưz Phú zuôr uô tâu têx ntơưr tsar yêz ntơư choz trâu sơưr đơưk.

Đhâu qênhz yuôx, xav jênhv, Công an huyện Phù Yên tưz uô tsênhz têx tsưr ziv nziêk đas nox co thiêz ntêk cxov Hà Minh Phú, sâu tsês  tâu 19 đeiv ntơưr tsar yêz chuôr, đros ntâu ntâuz ntơưr thor thiêz uô ntơưr tsar yêz chuôr. Ntơưv cơ quan công an, Hà Minh Phú krêz lênhk tiêk, tưz nziêk đas tâu luôs lưv tus 40 ntâu tsov đeiv nhiêx nox lơưv. Nhiv no txuz nuv co tsênhr tror tâu qênhz yuôx, uô tsênhz mênhx./.

 (Thu Thùy-Riê Lâux cxeik, nhênhv)