Cho môi tung mâu ngế tamo ki pơklêp kơkốu a Hngêi pơkeăng xiâm 103 Khu lêng Lếo, pôa Vanxay Lixayalath, 58 hơnăm ối a kong pơlê Savannakhet ôh tá pơtê tơdroăng ki hơniâp ro klêi kơ’nâi po pơklêp kơkốu hiăng chiâng xua mâu ƀok thái pơkeăng Việt Nam ƀă Lếo tơrŭm po. Pôa Vanxay Lixayalath ai tối, 5 hơnăm hdrối nah, pôa hiăng ‘nâi dêi châ tro châi êi kơkốu ƀă 2 hơnăm kơ’nâi mê, hiăng tơ’mot mơheăm. Hơnăm nah, pôa hiăng troh a Hngêi pơkeăng xiâm 103 Khu lêng Lếo vâ lăm khăm ƀă hnối po, pơklêp kơkốu.

“Hdrối vâ po, á tâ tung châ tơbrê rơlâi rơlo, kâ kế ki klâi xuân pá, ôh tá lŏn, chêng kŏng châi rơbâp rơbĕn, klêi kơ’nâi châ mâu ƀok thái pơkeăng akố po, á tâ tung châ chía rơ-ôi, chía lĕm tâ”.

Xuân môi tiah pôa Vanxay Lixayalath, ngoh Sangthong Keomonasi, 32 hơnăm ối a pơlê kong xiâm Vientiane ƀriê phoih tung hiâm mơno ‘na troăng hơlâ vêh tăng tơdroăng rêh ối dêi tơná ƀă hên tơdroăng ki pon mơhúa. Ngoh Sangthong Keomonasi ai tối: Kơtăn kố dâng 5 hơnăm, ngoh tâ tung châ châi ó, tơbrê tơbrêh, rơlâi rơlo, xua tơmiât dêi tơná bu tro tơngê, kơ-ôk tê mê ôh tá vâ lăm khăm a hngêi pơkeăng ƀă tí tăng lăm rôe xêh pơkeăng pa kong tơngah vâ ăm dêi ivá mo lĕm. Drêng tâ dêi tung châ rế hiá rế rơlâi rơlo, châi ó, ngoh nếo  lăm khăm a hngêi pơkeăng, drêng mê, nếo ‘nâi dêi châ hiăng tro châi kơkốu ki râ. Drêng mê, ngoh hiăng ôh pá tơngah dêi châ erêh xếo, tŭm tơdroăng cheăng kâ tung rơpŏng hngêi athế pơtê tâi tâng vâ tơkŭm khăm pơlât. Ƀă tơdroăng ki mơhúa mê, hiăng troh ƀă ngoh drêng ‘nâi Hngêi pơkeăng Khu lêng 103 Lếo dế tơrŭm ƀă Hngêi pơkeăng Khu lêng 103 dêi Việt Nam po, pơklêp kơkốu.

“Hdrối vâ po á hiăng chuâ kơhleăng mơheăm tung kơkốu ai 3 hdroh tung môi pơla măng tĭng. Nốkố, á tâ hiăng chía prêi lĕm, tơdroăng rêh chía tơniăn tâ”.

Dế nôkố, tâi tâng mâu ngế ki tamo châi klêi kơ’nâi pơklêp kơkốu ivá châ chăn chía dâi lĕm, ing tơdroăng ki mơnúa xo ngăn mơheăm, mơnhên ngăn têa nŭm, mâu tơdroăng ki mê hiăng châ hlo chía tơniăn iâ, ai mâu tamo ‘nâ hiăng chiâng vêh pêi cheăng tiah hmâ hdrối mê hía nah. Đăi tă Savengxay Dalasath, Kăn pơkuâ ngăn Hngêi pơkeăng xiâm 103 Khu lêng kuăn pơlê Lếo tối ăm ‘nâi, tơdroăng ki pơklêp kơkốu ing mâu ki pleăng dêi kơkốu a kong têa Lếo, cho vâ mơnhên tơdroăng ki hiăng rơkê, ki mơnhông ó khât hnoăng cheăng dêi hngêi pơkeăng, mê ối cho hvêa chêng prôk ki kal kân khât ƀă kơvâ pơkeăng, khăm pơlât dêi kong têa Lếo.

“Tơdroăng ki po, kơhleăng mơheăm, pơklêp kơkốu ăm mâu ngế ki tamo, tâng ôh ta ai tơdroăng tŏng kum dêi mâu ƀok thái pơkeăng Lêng Việt Nam mơni kô ôh tá kâi chiâng pêi pro klêi dêi hnoăng cheăng. Á pói tơngah tung la ngiâ ah, péa to hngêi pơkeăng, péa khu lêng rế hía rế ai mâu hvêa chêng prôk ki mơnhông hên tâ kơ mê nếo ‘na hnoăng cheăng ƀă tơdroăng khăm pơlât”.

Tơdroăng tơkêa bro tơrŭm cheăng po, pơklêp kơkốu dêi 2 to Hngêi pơkeăng lêng 103 dêi 2 to kong têa hiăng châ pơkâ pêi pro sap ing hơnăm 2018. Troh nôkố, péa pâ hiăng tơrŭm khăm pơlât, hiăng rơkê po pơklêp 9 ngế ki châi êi kơkốu a Hngêi pơkeăng xiâm lêng 103 kong têa Lếo. Peăng Việt Nam hiăng hbrâ dêi mâu ƀok thái pơkeăng, rơxế, kế tơmeăm, pơkeăng, kế khăm pơlât, peăng hngêi pơkeăng dêi Lếo hiăng hbrâ veăng ki po, hbrâ tơdroăng pơlât, mơjiâng khu ki hnê mơhno cheăng, mâu khu râ cheăng, tơkŭm tro tiô túa cheăng ki păng ‘nâng hiăng châ peăng Việt Nam tŏng kum, hnê tối.

Phŏ Yăo sư - Tiê̆n sih Vũ Nhất Định, Kăn phŏ pơkuâ ngăn hngêi pơkeăng lêng 103 tối ăm ‘nâi, kơnôm ai tơdroăng hnê tối dêi mâu ngế ki hriăn cheăng Việt Nam, mâu ƀok thái pơkeăng dêi Hngêi pơkeăng xiâm 103 Lếo hiăng chôa ‘lâng rơkê khât tung kih thuât nếo, maluâ mâu túa ki vâ pơklêp kơkốu, xuân môi tiah tơdroăng pơkâ rak ngăn mơngế tamo châi klêi kơ’nâi pơklêp ƀă hbrâ ‘nâi hdrối tơdroăng ki xía vâ, tâng lơ ai.

“Tơdroăng ki tŏng kum kong têa pú hmâ pơkâ ‘na kih thuât pơklêp kơkốu a kong têa Lếo cho hnoăng cheăng pêi pro ki rơkê kơnía ó khât, kơnôm ai tơdroăng ki tơrŭm pơla péa pâ tơnêi têa, peá khu; lêng ƀă mâu hdroâng mơngế dêi Lếo. Á tối tiah kố, kố cho tơdroăng pêi pro ki xiâm dêi rêm khu râ ngoh nâ ki prôk hdrối mê hía nah ƀă xuân cho vâ tơbâ hnê ăm khu rơxông nếo ki pơtối vâ rak ngăn tơrŭm cheăng pơla Việt Nam ƀă Lếo tung tơdroăng ki hơniâp ro, lĕm tơniăn”.

Tiô tơdroăng pơkâ, tung hơnăm kố, Hngêi pơkeăng lêng 103 Việt Nam kô pơtối tăng rah mơngế ki hriăn plĕng troh tơrŭm cheăng tŏng kum Hngêi pơkeăng xiâm 103 Khu lêng Lếo, po, pơklêp sap ing 10 troh 20 ngế ki châi êi kơkốu. Pakĭng mê, Hngêi pơkeăng xiâm 103 Khu lêng Lếo hiăng pơkâ tơdroăng cheăng sap nôkố troh a hơnăm 2025 ah kô chiâng pêi pro klêi đeăng tiô kih thuât pơklêp kơkốu, ing mê, veăng kum ăm tơdroăng khăm pơlât ivá châ chăn dêi tâi tâng kuăn pơlê mơdêk hnoăng cheăng tung tơnêi têa ƀă tung kơpong ƀă lâp plâi tơnêi.