Klêi kơ’nâi châ khăm ƀă hnê mơhno túa ki rak ngăn ivá a kơƀeăng khăm, pôa Y Juôn Niê (pâ H’Bluin) a ƀuôn Ea Nur, pơlê kân Pơng Drang, tơring Krông Ƀuk pơtối châ hnê mơhno troh tíu ki xo pơkeăng tê kơtê. Pôa Y Juôn tối: Sap ing nah xuân ối hlo tơbrêi rơlâi la hlo xuân ôh tá tơdjâk klâi hên mê ôh tá lăm khăm. Drêng ai mâu ƀok thái pơkeăng vêh khăm a cheăm mê pôa lăm khăm dêi ivá ƀă châ vâi tiâ mơnhên ‘na ivá châ chăn ăm pôa.

Pôa Y Juôn hlo mâu ƀok thái pơkeăng ki pleăng dêi hnoăng cheăng vâi kơtăng khât, kơhnâ ƀă mâu túa pơkeăng châ chêh xuân chía tŭm ƀă mâu túa pơreăng ki hmâ trâm.

"Tôh khăm ivá môi tiah kố ăm kuăn pơlê mê gá tro khât, drêng ai mâu tơdroăng môi tiah kố mê kuăn pơlê ai ivá ki ôh tá mo châ lăm troh khăm a cheăm, kuăn pơlê châ rak ngăn ivá, rak vế tơniăn ivá rơdêi mê rêm ngế pơrá phiu ro, ƀă ai hiâm mơno vâ khăm”.

Tơdroăng khăm pơlât ăm kuăn pơlê a pơlê kân Pơng Drang ối tung tơdroăng ki pleăng dêi hnoăng cheăng xua Khu ngăn Ƀok thái pơkeăng hơnăm ối nếo kong pơlê Dak Lak tơrŭm ƀă Khu pơkuâ ngăn Đoân Droh rơtăm tơbleăng, ƀă vâ chê 20 ngế ƀok thái pơkeăng veăng khăm. Peăng koxo má, hiăng ai vâ chê 500 ngế kuăn pơlê châ khăm ƀă hbru pơkeăng tê kơtê. Ai mâu ngế ki châi tamo ki ‘nâ ki râ mê châ mâu ƀok thái pơkeăng thế lăm khăm a mâu tíu khăm pơlât râ kơpêng.

Veăng tung tơdroăng kố, ƀok thái pơkeăng H’Luốc Niê, dế pêi cheăng a Tíu xiâm khăm pơlât tơring Krông Ƀuk tối:

“Phiu ro ƀă hâk tơngăm châ rơtế ƀă khu ƀok thái pơkeăng khăm pơlât ivá ăm kuăn pơlê. Tơkŭm po tơdroăng môi tiah kố mê pakĭng ki pơxúa tơdrêng khăm, pơlât ivá ăm kuăn pơlê mê ối kum khu ƀok thái pơkeăng dêi tíu xiâm ngăn pơkeăng pơlât hnê tối, hriâm ƀối xuân môi tiah mơdêk hnoăng cheăng dêi rêm ngế cheăng”.

Ƀă 16 chi hô̆i ối tung kong pơlê, vâ chê 1 rơpâu ngế hô̆i viên cho mâu ƀok thái pơkeăng hơnăm ối nếo, tung pơla hdrối kố nah, Khu ngăn Ƀok thái pơkeăng hơnăm ối nếo kong pơlê Dak Lak hiăng tơbleăng hên tơdroăng cheăng tŏng kum, khăm pơlât tơdrêng ivá ăm kuăn pơlê.

Mâu tơdroăng môi tiah “Tơdroăng ki hơ-ui xua ivá pơlê pơla”, “Hơngui pleăng dêi hnoăng ro Têt Lo hơnăm nếo rơtế ƀă mơngế kơtiê”, tơdroăng “Droh rơtăm pleăng dêi hnoăng a rơnó mơdrăng”, “Khế Droh rơtăm” ƀă hên ki ê châ hô̆i viên kơhnâ veăng.

Tung 5 hơnăm hdrối, Khu ngăn Ƀok thái pơkeăng hơnăm ối nếo kong pơlê Dak Lak hiăng tơkŭm po 120 rôh khăm, tiâ mơnhên ivá, hbru pơkeăng tê kơtê ăm 86 rơpâu ngế kuăn pơlê a kơpong hngế hngo, kơpong hdroâng kuăn ngo ƀă kơxô̆ liăn lối 4,2 rơtal liăn. Tung mâu rôh lăm prôk, Hô̆i ối tơrŭm ƀă khu ki tŏng kum diâp 2.400 kơxuô tơmeăm cho tơmeăm ki kal xúa, hmân ếo ăm kuăn pơlê ai tơdroăng rêh ối xơpá; hbru lối hrĭng hnoăng liăn hriâm rơkê, kế xúa tung hriâm tâp, rơxế mái ăm hok tro kơtiê, kuăn tê, hok tro hdroâng kuăn ngo mơeăm hriâm rơkê.

Tơkŭm hnê hriâm mâu tơdroăng ki pơlât apoăng ăm lối rơpâu ngế thái cô hngêi trung mầm non, râ má môi; hnê tối ivá chiâng vâ rơnêh kuăn ăm mâu phô̆m vâ xông kân, hbrâ mơdât pơreăng ăm lối rơpâu ngế hok tro, sinh viên ƀă hên ki ê.

Ngoh Y Lê Pas Tơr, Kăn phŏ pơkuâ ngăn Đoân Droh rơtăm kong pơlê, Kăn hnê ngăn Khu droh rơtăm Việt Nam kong pơlê Dak Lak ăm ‘nâi, tơdroăng cheăng dêi Khu ngăn ƀok thái pơkeăng hơnăm ối nếo hiăng kum pro ai hên tơ’nôm mâu tơdroăng cheăng mơhnŏng pleăng dêi hnoăng kum pơlê pơla, mơhnhôk hiâm mơno rêh ối lĕm xua pơlê pơla tung đoân viên droh rơtăm Dak Lak.

“Mâu ngoh nâ ƀok thái pơkeăng hơnăm ối nếo mơdêk khât hiâm mơno ki pleăng dêi hnoăng xua tơdroăng rêh ối, xua pơlê pơla ƀă mơdêk ivá cheăng, tơdroăng cheăng dêi tơná vâ veăng tung mâu tơdroăng pêi pro tơdjuôm dêi hơnăm ối nếo kong pơlê, kum rak ngăn ivá ăm kuăn pơlê a mâu tơring cheăm ki xơpá, kơpong hngế hngo, kơpong tơkăng kong”.

Tiô ƀok thái pơkeăng Phan Thành Trinh, Kăn hnê ngăn Ƀok thái pơkeăng rơxông nếo Dak Lak, ƀă tơdroăng pơkâ pêi pro “Ƀok thái pơkeăng hơnăm ối nếo Dak Lak pêi tiô rơkong Pôa Hồ, pleăng dêi hnoăng xua ivá pơlê pơla”, mâu hô̆i viên đi đo kơhnâ veăng tung mâu tơdroăng vâ ai tơ’nôm tơdroăng cheăng rơkê, mơdêk tơdroăng ki rơkê, hnoăng cheăng pêi, ing mê, kum ngế ki tamo rế hía rế tơniăn lĕm tâ.

“Khu ngăn Ƀok thái pơkeăng hơnăm ối nếo pơtối tơbleăng tơdroăng Ƀok thái pơkeăng hơnăm ối nếo pêi tiô rơkong Pôa, pleăng dêi hnoăng xua ivá pơlê pơla. Malối, rêm ngế hô̆i viên kô mơdêk hiâm mơno djâ troăng ahdrối dêi tơná a mâu tơring cheăm, kơpong ƀă kum xua tơdroăng rêh ối pơlê pơla”.

Ôh tá xâu tơdroăng pá, khu Ƀok thái pơkeăng hơnăm ối nếo Dak Lak hiăng djâ troăng ahdrối pleăng dêi hnoăng troh mâu thôn pơlê kơpong hngế hngo vâ khăm, pơlât ăm vâi krâ nhŏng o. Mâu rôh lăm mê, ôh ti kum ăm vâi hriâm pât hiâm mơno ngế ƀok thái pơkeăng, mơdêk hiâm mơno ƀok thái pơkeăng ki rơkê mê ối mơhno hiâm mơno pôu râng, mơdêk ivá hơnăm ối nếo, pleăng dêi hnoăng xua vâ rak ngăn ivá pơlê pơla.