VOV4.Xơ Đăng - Tiô riân ngăn dêi Tíu xiâm Hbrâ mơdât châi tamo kong pơlê Dak Lak, sap ing apoăng hơnăm troh hâi lơ 31/7, Dak Lak hiăng ‘nâi ai 2.451 ngế tâ pơreăng tơngê lo mơheăm, tâk 5,1 xôh tâng pơchông ƀă khế kố hơnăm 2021, ai 1 ngế hlâ. Tung mê, tơring Ea Súp ai kơxô̆ ngế tâ pơreăng tơngê lo mơheăm hên má môi ƀă 297 ngế, pơtối mê cho tơring Krông Pač ƀă kơxô̆ ngế tro ai 267 ngế, pơlê kong kơdrâm Ƀuôn Ma Thuột ai 258 ngế ƀă tơring Ƀuôn Đôn ai 214 ngế.

Dak Lak ai lối 2.450 ngế tâ pơreăng tơngê lơ mơheăm

Nôkố, 15 tơring, pơlê kong krâm, pơlê kong kơdrâm hiăng ‘nâi ai 140 tíu ai pơreăng tơngê lo mơheăm. Khu cheăng ‘na khăm pơlât hiăng xôh pơkeăng, pro mơgrúa lĕm kong prâi tơnêi tíu. Kơvâ ngăn pơkeăng pơlât tiô tối hdrối pơreăng tơngê lo mơheăm kô tâk hên nếo a khế 8/2022. Jâ Ngô Thị Minh Trinh, kăn phŏ hnê ngăn Vi ƀan tơring Krông Pač ăm ‘nâi: Tơring hiăng pơkâ thế ăm khu ki cheăng ‘na khăm pơlât ƀă mâu tơring, cheăm mơhnhôk kuăn pơlê môi tiah: koi athế kât mi tơkel, kơdê kiâ ngu ngĕng, mâu kuăn kiâ ki pro chiâng ai pơreăng, mơgrúa lĕm tíu ối vâ kơdroh iâ pơreăng tâ tú.

Katarina Nga tơplôu ƀă tơbleăng