A rôh trâm mâ tơpui tơno, pôa Nay Phi La, Kăn pơkuâ Khu ngăn pơkeăng ƀă khăm pơlât kong pơlê Dak Lak ăm ‘nâi, ƀă ivá mơ-eăm dêi tâi tâng mâu kăn pơkuâ, kăn ƀô̆, kong chưk, viên chưk, ngế pêi cheăng tung mâu hơnăm hdrối, kơvâ ngăn pơkeăng ƀă khăm pơlât Dak Lak hiăng pêi châ hên mâu tơdroăng, túa pơkâ châ pơcháu, veăng kum rak vế tơniăn hnoăng cheăng khăm pơlât ivá châ chăn kuăn pơlê tung kong pơlê.

Troh nôkố, tâi tâng mâu cheăm, bêng, pơlê kân ai hngêi pơkeăng; 97% hngêi pơkeăng cheăm ai ƀok thái pơkeăng khăm pơlât, tâi tâng mâu hngêi pơkeăng ai kơmăi vi tĭnh tơdjêp măng ƀă xúa mâu phần mềm pơkuâ ngăn ‘na tơdroăng khăm pơlât. Kơxô̆ ngế châ xúa ƀaoh hiêm khăm pơlât châ lối 92%.

Pakĭng mâu tơdroăng ki pêi châ tơƀrê mê, mâu hơnăm hdrối, kế tơmeăm xúa, môi tiah pơkeăng, trếo pơkeăng xúa ăm mâu ngế tamo ối kal hên; kơxô̆ ngế cheăng xuân tá hâi ai tiô tơdroăng ki vâ, malối cho tơdroăng ki ối kal mâu ƀok thái pơkeăng ki rơkê cho ối kal hên.