Kơvâ ngăn mơnăn kong pơlê Dak Lak dế tơrŭm ƀă mâu tơring, pơlê kong krâm, pơlê kong kơdrâm hbrâ rơnáu hnê tối ăm kuăn pơlê hbrâ mơdât pơreăng kôk rơxôk; tơdrêng amê hlối tối tơbleăng tơdroăng pâk vaccine ăm mâu chó miếo. Tiô riân dêi khu pơlât mơnăn kong pơlê Dak Lak ăm hlo, lâp kong pơlê nôkố ai dâng 180 rơpâu to chó, miếo cho kuăn kiâ păn dêi mâu rơpŏng.

Sap ing apoăng hơnăm troh nôkố, a kong pơlê hiăng ai 2 ngế hlâ xua chó rơxok kâ, lối châ ngế ki ê châ pâk pơkeăng hbrâ mơdât pơreăng teăm tơdrêng. Kơ koan ki ai tơdjâk troh hiăng châ hlo, prâu tah lối chât to chó ki rơxok. Dâng 64 rơpâu to chó, miếo hiăng châ pâk vaccine – hbrâ mơdât pơreăng kôk, rơxok tung apoăng hơnăm kố nah.

Pôa Trần Ngọc Sơn, Kăn phŏ ngăn păn mơnăn mơnoâ kong pơlê Dak Lak tối tơbleăng, nôkố rơtế ƀă tơdroăng ki thăm mơdêk hnoăng cheăng pâk vaccine ăm mâu chó, miếo, kơvâ ngăn mơnăn mơnoâ tơrŭm ƀă cheăm tơring hnê tối vâ kuăn pơlê mơdêk ki hlê plĕng, hbrâ rơnáu mơdât pơreăng kôk, rơxok, păn kroăng kuăn kiâ tung kơdroăng kal athế krâu tơniăn.