Tíu xiâm khăm pơlât tơring MDrak, kong pơlê Dak Lak ai 12 khoa ƀă 13 hngêi pơkeăng cheăm, pơlê kân laga bu ai 43 ƀok thái pơkeăng ƀă 11 ƀok thái pơkeăng chuyên khoa I. Tiô jâ Lê Thị Thủy, Kăn pơkuâ Tíu xiâm ngăn pơkeăng ƀă khăm pơlât MDrak ăm ‘nâi, klêi hơnăm 2019 ƀă tơdroăng pêi pro mâu Thông tư 37 ƀă Thông tư 07 dêi Khu xiâm pơkuâ ngăn pơkeăng ƀă khăm pơlât ‘na tơdroăng tơ’mot môi mâu Tíu xiâm ngăn pơkeăng ƀă khăm pơlât hên tơdroăng pêi cheăng mê hngêi pơkeăng pá xôp pôu râng tơ’nôm hên hnoăng cheăng môi tiah: khăm pơlât, tơdroăng khăm pơlât ki hbrâ, pơ’leăng mâ mơngế ai kuăn preăng kuăn iâ, pêi pro mâu tơdroăng pơkâ xiâm tơnêi têa ‘na khăm pơlât...

Môi ngế kăn ƀô̆ thế pêi hên tơdroăng cheăng tơdrêng amê kơxô̆ tơdroăng cheăng kâ. Tơdroăng kố pro khu ƀok thái pơkeăng thế mơ-eăm châ 2 troh 3 xôh nếo kêi pêi đeăng hnoăng cheăng châ pơcháu. Tơdroăng cheăng hên, mơngế pêi cheăng ôh tá ai tŭm, tơdroăng khăm pơlât a hngêi pơkeăng pa xôp ai drêng hâ ho. Jâ Lê Thị Thủy tối ăm ‘nâi:

“Mơhé ngin ai tơdroăng kal vâ rah xo mơngế ƀă xuân ai hên troăng hơlâ dêi Tíu xiâm xuân môi tiah mơhnhôk Pơkâ dêi Hô̆i đong kuăn pơlê kong pơlê laga xuân ôh tá ai ƀok thái pơkeăng troh mot pêi cheăng hluâ hên xôh rah xo. Xua ƀă hngêi pơkeăng, pakĭng hbrâ hnê mơjiâng liên thông kăn ƀô̆ a kố, xuân pói vâ ai môi troăng hơlâ tơniăn ‘na tơdroăng kơjo, mơhnhôk ki phá tơ-ê ăm kăn ƀô̆ ki rơhêng vâ tối cho ƀok thái pơkeăng klêi mê kăn ƀô̆ ki rơkê troh pêi cheăng a hngêi pơkeăng pa xôp’’.

Mơhé xoăng koi pơlât, kơmăi kơmok khăm pơlât tŭm, laga xua ôh tá rah xo châ ƀok thái pơkeăng xa mê mâu hơnăm hiăng hluâ Tíu xiâm ngăn pơkeăng ƀă khăm pơlât tơring Krông Ƀuk, mê cho xiâm kối tơdjâk troh tơdroăng khăm pơlât, xuân môi tiah tơdroăng ki hôm tung khăm pơlât a hngêi pơkeăng.

‘’Ƀok thái pơkeăng ôh tá tŭm, nôkố mâu ƀok thái pơkeăng dế pêi cheăng a Krông Ƀúk mê nếo lo mơgêi hngêi trung, tá hâi ai chưng chih pêi cheăng, tá hâi chiâng rơkê tung pêi cheăng. Ki rơhêng vâ tối cho ôh tá tŭm ƀok thái pơkeăng chuyên khoa ngoăi, chuyên khoa sản ƀă chuyên khoa gây mê hồi sức ƀă mâu ƀok thái pơkeăng chuyên khoa ki ê, xua mê tơdroăng rah xo khăm pơlât ‘na hê̆ ngoăi san bu pơlât apoăng vâ pơtroh pơlât a hngêi pơkeăng râ kơpêng tê.

Ƀă po pơlât xuân ôh tá pêi pro xua ôh tá ai ƀok thái pơkeăng gây mê, ƀok thái pơkeăng po pơlât. Na khăm pơlât mê Tíu xiâm ngăn pơkeăng ƀă khăm pơlât ôh tá ai ƀok thái pơkeăng chuyên khoa mê xuân ôh tá chiâng khăm ivá ƀă ăm mơ-éa khăm ivá ăm kuăn pơlê’’.

Tiô Khu pơkuâ ngăn pơkeăng ƀă khăm pơlât Dak Lak lâp kong pơlê dế kal lối 1.700 ƀiên chê̆ ƀok thái pơkeăng, ƀă bu châ kơxô̆ 7,15 ƀok thái pơkeăng/10 rơpâu kuăn pơlê tâng pơchông pơkâ cho 8 ƀok thái pơkeăng/10 rơpâu kuăn pơlê. Tơdroăng hâ ho hngêi pơkeăng dế ai a hên hngêi pơkeăng dêi kong pơlê, ƀă ivá xoăng koi pơlât a kơlo 110% troh 130%. Xiâm kối chiâng ai tơdroăng ôh tá bê ƀok thái pơkeăng a hngêi pơkeăng xua tơdroăng pêi cheăng hngăm, hơkăng.

Tơdrêng amê, mơhá hnoăng liăn tiô tơdroăng cheăng ƀă mâu tơdroăng mơhá hnoăng liăn phá tơ-ê dêi pó tiô kơlo liăn ki pơkâ ngăn tơdjuôm cho iâ, tá hâi tơxâng ƀă tơdroăng pêi cheăng.

Vâ rak tơniăn tơdroăng kố, kơvâ ngăn pơkeăng ƀă khăm pơlât Dak Lak hiăng tơbleăng ăm Vi ƀan kong pơlê troăng pơcháu Khu ngăn pơkeăng ƀă khăm pơlât ăm mâu tơring pơkuâ ƀă mơ’no liăn cheăng. Tơdrêng amê Kơvâ ngăn pơkeăng ƀă khăm pơlât xuân kô mơjiâng môi tơdroăng tơkêa bro xúa ƀok thái pơkeăng pakong mot khăm pơlât a hngêi pơkeăng tơnêi têa ƀă mơhá liăn tơxâng. Tơdroăng rah xo mâu thái pơkeăng, ƀok thái pơkeăng a tung kong pơlê xuân kơjo pêi pro tung la ngiâ.

Pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak tối ăm ‘nâi:

“Nôkố mê, Khu pơkuâ ngăn pơkeăng ƀă khăm pơlât hiăng pơkâ hên troăng, troăng pêi môi tiah mâu ngế kot mâ, xông kân a kong pơlê kô châ tơdah tơdrêng a pơlê ki mê. Hơnăm 2023 kô pơtối rah xo cho kơjo Hngêi trung Đăi hok Tây Nguyên, Đăi hok Ƀuôn Ma Thuột xuân môi tiah mâu sinh viên kal vâ vêh pêi cheăng a kong pơlê’’.

Ôh tá bê mơngế pêi cheăng, ki rơhêng vâ tối khu ƀok thái pơkeăng dế cho pơloăng mơnúa ôh tá kŭn ƀă kơvâ ngăn pơkeăng ƀă khăm pơlât. Mơhé tung pơla kố nah, kong pơlê hiăng pêi pro hên troăng hơlâ mơhnhôk ƀok thái pơkeăng xuân môi tiah tơmâng rah xo kăn ƀô̆ ngăn pơkeăng ƀă khăm pơlât lăm hnê mơjiâng tuăn ngôa mơdêk tơdroăng cheăng, laga xuân tá hâi tơxâng pêi pro pơkâ nôkố. Vâ pơtối râng chêng ƀă mơhnhôk châ ƀok thái pơkeăng troh pêi cheăng a hngêi pơkeăng tơnêi têa, pakĭng troăng hơlâ mơhnhôk, kal ai tơ’nôm mâu troăng pêi ki ê vâ vâi hmiân tuăn pêi cheăng, hâk vâ ƀă tơdroăng pêi cheăng.