VOV4.Xơ Đăng - Kơ’nâi to lâi khế hiăng rơhĭng pơreăng COVID-19, mâu hâi achê kố, tung kong pơlê Dak Lak hiăng tâng tối ai mâu ngế tâ COVID-19 tâk hên. Bú riân tung 20 hâi achê kố, kong pơlê hiăng tối ai 600 ngế tâ tú. Kơxô̆ mơngế tâ tú tâk hên, kơxô̆ mơngế pâk vaccine hbrâ mơdât COVID 19 hâi ai tiô pơkâ dêi Khu xiâm ngăn pơkeăng tơbleăng hiăng pro tơdroăng hbrâ mơdât pơreăng COVID-19 a Dak Lak trâm hên xơpá. Kơvâ ngăn pơkeăng Dak Lak kô pêi pro ti lâi tơdroăng mê?

-Pâ pôa tối ăm ‘nâi pơreăng COVID-19 tung kong pơlê Dak Lak tung pơla achê kố?

Pôa Nay Phi La: Tung kong pơlê Dak Lak troh nôkố hâi lơ 12/9 tâi tâng kơxô̆ mơngế tro tâ pơreăng COVID-19 hiăng tâk hên, nôkố hiăng ai 578 ngế. Kơxô̆ mơngế tro tâ tâk achê kố ai hên xiâm kối, má môi mơhé hiăng pêi pro pâk vaccine trum má 4 ƀă trum vêh pâk laga pakĭng mê ai tơdroăng mâu vâi muăn klêi kơ’nâi môi pơla tro tâ COVID-19 mê tá hâi châ pâk trum ki lâi. Ki rơhêng vâ tối ƀă mơngế kân klêi kơ’nâi pâk 3 trum mê tơmiât dêi tơná kô ai trếo mơdât pơreăng ƀă drêng ôh tá châ pâk trum má 4 mê kơxô̆ tâk COVID a mơngế kân hiăng tâk hên. Kố xuân cho tơdroăng ki tô tuăn xua tơdroăng hlê plĕng dêi kuăn pơlê tung tơdroăng pâk vaccine drêng kố’’.

-Ê, kô chiâng hlo, tung roh tơplâ mơdât COVID-19 mê vaccine cho kế ki kal vâ mơdât pơreăng, laga tiô riên dêi Khu pơkuâ ngăn pơkeăng ƀă khăm pơlât mê kơxô̆ kuăn pơlê sap ing 18 hơnăm tơngi klêng pâk vaccine hbrâ mơdât COVID-19 trum má pái châ 86% ƀă trum má 4 châ lối 66%. Vâi hdrêng sap ing 12 troh 17 hơnăm, pâk trum má 3 châ 68% ƀă vâi hdrêng sap ing 5 troh pá kơdâm 12 hơnăm trum má 1 châ 90% ƀă trum má 2 châ 45%. Kơxô̆ kố ối iâ tâ tâng pơchông ƀă pơkâ dêi Khu xiâm ngăn pơkeăng ƀă khăm pơlât, mê troăng vâ mơdêk kơxô̆ vaccine hbrâ mơdât COVID-19 tung la ngiâ kô ki klâi ô pôa?

Pôa Nay Phi La: Drêng ai tơdroăng mê, mê Khu xiâm pơkuâ ngăn pơkeăng ƀă khăm pơlât hiăng mơhnhôk tơdroăng pêi ‘’Xua môi Việt Nam krá tơniăn ƀă mo rơdêi pơlê pơla xuân môi tiah tâi tâng khu cheăng, mê kơvâ ngăn pơkeăng ƀă khăm pơlât hiăng mơjiâng môi pơkâ pêi tơdroăng tơkêa bro kô tơrŭm ƀă Khu pơkuâ hnê hriâm dêi kong pơlê Dak Lak xuân môi tiah tâi tâng mâu tơring, pơlê kong krâm xuân môi tiah tơdroăng ki veăng dêi khu cheăng kal kí. Tiô Pơkâ pêi hâi lơ 24/9 kố Vi ƀan kong pơlê kô tơkŭm po Leh mơhnhôk tơdroăng pơtâng tối hbrâ, mơdât pơreăng COVID-19 tung tơdroăng ki nếo ƀă dó inâi ‘’Xua môi Việt Nam krá tơniăn, mo rơdêi’’. Ƀă  pâk vaccine hbrâ mơdât COVID-19 ăm vâi hdrêng. Rơtế ƀă mê, kơvâ ngăn pơkeăng ƀă khăm pơlât kô pêi pro pâk tâi tâng mâu tíu pâk drêng mâu muăn troh hngêi trung hriâm vâ tơniăn mâu muăn châ pâk tŭm vaccine ƀă châ hên ‘’Xua môi Việt Nam krá tơniăn ƀă mo rơdêi.

Dak Lak thăm tơ’nôm vaccine COVID-19

-Ô pôa, drêng pơreăng COVID-19 xông tâ tú ó, drêng lâp tơnêi têa xuân châ hlo kơxô̆ mơngế tro tâ ƀă tơdroăng ki hlo ai pơreăng ki nếo dêi virus SARS-CoV-2, pơla kố nah Khu xiâm pơkuâ ngăn pơkeăng ƀă khăm pơlât hiăng tơƀleăng pơtâng hnê tối hbrâ, mơdât pơreăng COVID-19 tung chal nếo mê cho pơtâng hnê tối 2K, mê pơtâng hnê tối kố ai ki klâi nếo tâng pơchông ƀă mâu tơdroăng pơtâng hnê tối hdrối nah, ô pôa?

Pôa Nay Phi La: Tơdroăng 2K akố mê cho xôh pơkeăng kơdê pơreăng ƀă pâng rơkong môh mê cho pơklât ƀă mâu ngế ki nhôm drêng pin mot a mâu tíu kơdrâm mơngế môi tiah kơchơ lơ tíu ôh tá ai khía mê thế pâng rơkong môh ƀă xếo kŏng ƀă pơkeăng kơdê pơreăng. Rơtế amê thế thăm tơ’nôm vaccine, vaccine mê ngin hiăng pêi pro ƀă xuân môi tiah pơkeăng ƀă pơlât mê ki kố tâi tâng hngêi pơkeăng, mâu tíu xiâm khăm pơlât hiăng hbrâ tŭm tâi tâng mâu pơkeăng drêng ai ngế tro tâ COVID ƀă môi tung mâu tơdroăng ki kal má môi cho hlê plĕng dêi kuăn pơlê, mơhé pin hiăng hluâ hneăng ki ai hên pơreăng xông tâ tú laga xuân thế rak tơniăn tơdroăng pâk vaccine xuân môi tiah pêi pro mâu pơkâ dêi Khu xiâm pơkuâ ngăn pơkeăng ƀă khăm pơlât mê pin nếo mơdât tâi tâng pơreăng COVID-19’’.

-Ê, pâ mơnê kơ pôa hên!

Vũ Nam Trang chêh

A Sa Ly tơplôu ƀă tơbleăng