Roh má 3  djâ dêi kuăn troh a Hngêi pơkeăng cheăm vâ pâk vaccine 5 tung 1, la nâ H’Čuôn Ksor, ối a cheăm Krông Jing, tơring MDrak xuân athế prếo xêh xo xo xua tá hâi teăm ai vaccine. Nâ H’Čuôn tối ăm ‘nâi, nâ tâng tơdroăng pơtâng mê a rơ’jíu, hlá tơbeăng, dế pơla kố hên pơreăng dế tâ tú, la drêng djâ dêi kuăn lăm pâk pơkeăng ôh tá ai vaccine mê nâ tô tuăn ó khât:

‘’Kuăn á hiăng 4 khế tơdế la tá hâi teăm châ pâk vaccine 5 tung 1. Nôkố á djâ dê kuăn lăm pâk pơlât tơdroăng châi la xuân ôh tá ai vaccine. Á pói rơhêng châ ai vaccine vâ pâk ăm dêi kuăn”.

Nâ H’Yên Niê, Kăn pơkuâ ngăn Hngêi pơkeăng cheăm Krông Jing, tơring MDrăk tối ăm ‘nâi, lâp cheăm nôkố ai lối 220 ngế vâi ‘nĕng lối 2 khế athế pâk vaccine 5 tung 1 la xuân tá hâi teăm châ pâk. Tiô nâ H’Yên, tơdroăng ki ôh tá bê vaccine ton khế ti xê to pơloăng ăm vâi ‘nĕng, mê ối pro pơloăng ăm vâi nôu pâ drêng thế vâi djâ dêi kuăn ‘nĕng lăm pâk pơkeăng, xua vâi tơbrê prôk lăm hên hdroh ƀă ôh tá loi tơdroăng ki ai pơkeăng vâ pâk xếo:

“Dế nôkố ôh tá bê vaccine ó ‘nâng, maluâ vaccine 5 tung 1, hiăng luâ 6 khế kố ôh tá ai vaccine, klêi mê, vaccine ki pâk mơdât ki rơbông tung krôk vâi ‘nĕng, vaccine DPT xuân ôh tá ai. Xua mê râ, tơdroăng ki pơtâng tối ăm mâu nôu pâ vâi ‘nĕng lăm pâk kô trâm pá, xua vâi ôh tá loi xếo. Pơtih, vâi troh roh má 1 ôh tá ai, má 2 ôh tá ai, má 3 xuân ôh tá ai, mê kơ’nâi ah vâi ôh tá la lâi rơhêng vâ djâ dêi kuăn lăm troh a hngêi pơkeăng cheăm xếo, vâi kô lăm pá kong”.

Tiô jâ Lê Thị Thuỷ, Kăn pơkuâ ngăn tíu xiâm ngăn ‘na pơkeăng ƀă khăm pơlât tơring MDrăk, tơring MDrăk cho môi tung mâu tơdroăng ki tơring kố hiăng ai hên cheăm ối tung kơpong ki pâk pơkeăng. Tung mâu hơnăm hdrối mê hía nah, kơvâ ngăn ‘na pơkeăng ƀă khăm pơlât tơring đi đo trâm pá tung tơdroăng ki mơhnhôk nôu pâ djâ dêi kuăn lăm pâk pơkeăng tŭm ƀă tro. Nôkố ôh tá ai tŭm vaccine, ing mê, khoh pro pá tung tơdroăng ki ivá châ chăn kuăn

“Hdrối nah, maluâ Khu xiâm ngăn ‘na pơkeăng ƀă khăm pơlât hbru vaccine ôh tá bê tŭm, MDrăk cho môi tung mâu tơring ki kơtiê xuân hiăng trâm pá puât ‘na tơdroăng ki pâk pơkeăng, maluâ cho mâu cheăm ối a kơpong hơngế, hơngo, kơpong kuăn pơlê hdroâng kuăn ngo, nôkố, vaccine ôh tá bê xếo, mê thăm rế trâm pá tâ. Tơdroăng ki pâk vaccine ăm vâi hdrêng athế châ  pâk đi đo tro tiô hâi khế ƀă tiô tơdroăng ki hdrối ki kơ’nâi, tâng ga hrá, ôh pá teăm vâ pâk ga kô tơdjâk troh tơdroăng ki mơdât pơreăng tâ tú ăm vâi hdrêng”.

Ôh tá bê pơkeăng vaccine pâk ăm vâi ‘nĕng mê cho tơdroăng ki hmâ ai tung kong pơlê Dak Lak. Tiô pôa Võ Minh Hùng, Kăn pơkuâ tíu xiâm ngăn ‘na pơkeăng ƀă khăm pơlât dêi pơlê kong kơdrâm Ƀuôn Ma Thuột, sap ing apoăng hơnăm troh nôkố, pơlê kong kơdrâm hiăng tâi vaccine DPT, vaccine 5 tung 1 nếo bu hbru 1 hdroh a khế 1 ai 368 klŏng, tung pơla mê, rêm hơnăm pơlê kong kơdrâm kal ai dâng 15 troh 18 rơpâu klŏng vaccine 5 tung 1.

“Troh a chôu phut kố, vâi ‘nĕng pá kơdâm 1 hơnăm pâk bê 8 klŏng vaccine a pơlê kong kơdrâm, pơla mê ngin bu xiâm pâk châ 30%, tâng tiah mê, xuân u ối iâ tâng vâ pơchông ngăn ƀă tơdroăng pơkâ tung plâ hơnăm ai 98%. Xua mê, tung la ngiâ kố ah, á pâ thế khŏm ai tŭm vaccine 5 tung 1 tối krê ƀă vaccine tung tơdroăng pâk po rơdâ dêi tơnêi têa tối tơdjuôm vâ thăm mơdêk tơdroăng pâk tŭm ăm vâi hdrêng, veăng kum rak vế ivá châ chăn ăm vâi muăn, vâi cháu”.

Tiô kơxô̆ chêh tối tung hlá mơ-eá dêi Tíu xiâm hbrâ mơdât pơreăng dêi kong pơlê Dak Lak ăm ‘nâi, tung 12 khu vaccine ối tung hneăng pâk pơkeăng po rơdâ ăm vâi ‘nĕng tung hơnăm 2023 Dak Lak nếo châ ai tŭm 2 túa vaccine chó khăng ƀă châi hrê hbáu rơtốu, 2 túa vaccine cho 5 tung 1 ƀă DPT hiăng tâi, ki u ối bu bê vâ pâk ăm vâi hdrêng tâi troh khế 8.

Tiô pôa Lê Phúc, Kăn phŏ hnê ngăn Tíu xiâm séa ngăn pơreăng kong pơlê Dak Lak tối, ki xiâm dêi tơdroăng ôh tá bê vaccine xua ing hơnăm 2023 drêng hơ’lêh tơdroăng ki ngăn ‘na pơ’leăng mâ mơngế, cho tơdroăng cheăng rêm hơnăm, athế ai liăn ki mơhá ăm ‘na tơdroăng kố. Maluâ ti mê, ki păng ‘nâng, tơdroăng ki pơtroh liăn ngân vâ kong pơlê pơtroh liăn ngân vâ rôe vaccine ối trâm pá ‘na yă, tơdroăng ki tí tăng rôe pơkeăng. Tíu xiâm mơdât pơreăng dêi kong pơlê hiăng chêh tối tŭm mâu tơdroăng ki kal vâ rôe vaccine ƀă tơdroăng pơkâ ai tŭm kơxô̆ vaccine tung plâ hơnăm 2023 ƀă hơnăm 2024, klêi mê, ngin tối tơbleăng ăm Khu ngăn ‘na pơkeăng ƀă khăm pơlât kong pơlê, klêi mê, Khu kăn ‘na pơkeăng kong pơlê pơtroh hlá mơ-eá ăm Vi ƀan hnê ngăn kong pơlê vâ ăm phep ‘no liăn rôe pơkeăng.

Pôa Lê Phúc, Kăn phŏ ngăn Tíu xiâm seá ngăn ƀă hbrâ mơdât pơreăng kong pơlê Dak Lak tối ăm ‘nâi:

“Vâ pôi tá ai pơreăng tâ tú tung pơlê pơla mê athế pơtối pâk vaccine troh tiô rơnó ƀă athế pro ti lâi pâk pơkeăng mê tro rơnó, tro roh, ƀă châ pơtối rak vế đi đo. Laga, tơdroăng ki pơtê pâk vaccine bu chiâng phep pơtê iâ, kơtăn ai 1 lơ 2 khế tê, tâng rĕng ai vaccine mê athế pơtối pâk tŭm tâi tâng. Ngin xâu má môi mâu vâi ‘nĕng ki tá hâi teăm châ pâk vaccine ki lâi ôh, tâng ôh tá ai vaccine kố pro ôh tá tơniăn ăm ivá châ chăn vâi hdrêng”.

Tiô mâu ngế ki hriăn plĕng ‘na khăm pơlât, ôh tá bê vaccine kô ai tơdjâk troh tơdroăng ki pâk vaccine po rơdâ. Ki xiâm dêi tơdroăng ôh tá bê vaccine kô pro vâi hdrêng ôh tá châ pâk tro tiô hâi khế pơkâ, tơdroăng kố, pro tơdjâk troh ivá châ chăn kô tơ’lêi pơreăng tâ tú.