VOV4.Xơ Đăng - Tiô tơdroăng riân ngăn dêi Tíu xiâm Hbrâ mơdât châi tamo kong pơlê Dak Lak, riân troh hâi lơ 28/9, lâp kong pơlê ai 729 ngế tro pơreăng thĕn kŏng chêng rơkong tâk lối 30% tâng pơchông ƀă khế kố hơnăm 2021. Kơxô̆ ngế châ ‘nâi a 15/15 tơring, pơlê kong krâm, pơlê kong kơdrâm dêi kong pơlê, tung mê ai mâu tơring ki ai ngế ki tro pơreăng thĕn kŏng chêng rơkong hên má môi cho pơlê kong kơdrâm Ƀuôn Ma Thuột, tơring Ƀuôn Đôn, Čư̆ Mgar, Krông Pač ƀă pơlê kong krâm Ƀuôn Hồ.

Ƀok thái pơkeăng Khoa Nhi – Hngêi pơkeăng kân kơpong Tây Nguyên khăm ăm mâu vâi hdrêng ki tro thĕn kŏng chêng rơkong

Pôa Lê Phúc, kăn phŏ ngăn Tíu xiâm hbrâ mơdât châi tamo kong pơlê Dak Lak ăm ‘nâi, vâ hbrâ mơdât tơdroăng ki tâ tú dêi pơreăng thĕn kŏng chêng rơkong, kơvâ ngăn pơkeăng ƀă khăm pơlât Dak Lak kô séa ngăn pơreăng, teăm châ hlo mâu tíu ki ai pơreăng, vê hdró, xôh kơdê pơreăng ƀă kum mâu tơring cheăm tung tơdroăng ki hbrâ mơdât pơreăng, pơlât tơdrêng lơ kal.

VOV Tây Nguyên/Tơplôu: Katarina Nga