Dế rak ngăn kuăn kơdrâi 16 khế a Khoa nhi Tổng hợp Hngêi pơkeăng kân kơpong Tây Nguyên, nâ Huỳnh Thị An ối a cheăm Čư̆ M’Lan, tơring Ea Súp, kong pơlê Dak Lak tối ăm ‘nâi, kơtăn kố dâng 1 măng tĭng, nâ hlo dêi kuăn kơ-o hên, tơƀrêi tơbrêh, tơngê râ ƀă tung kơpeăng kŏng, chêng êi po pom lo têa hơtốu drêng djâ lăm khăm, ƀok thái pơkeăng tối muăn tro pơreăng thĕn kŏng chêng rơkong.

Klêi kơ’nâi 3 hâi pơlât a hngêi ôh tá prêi lĕm, rơpŏng hiăng djâ muăn mot a hngêi pơkeăng kân kơpong Tây Nguyên:

“Drêng mot a kố êi po pom lo têa hơtốu hên a 2 kơpeăng chêng klêi mê tâ iâ a kơpeăng kŏng nếo. Á xuân ôh tá ‘nâi hên ‘na pơreăng thĕn kŏng chêng rơkong xua mê cho a hngêi tơmeăm xah hêi ăm kuăn xah tiah mê tê xuân ôh tá tơmiât rơnó kố pơreăng kố xông tâ tú’’.

Xuân rak kuăn 7 hơnăm tro tâ pơreăng thĕn kŏng chêng rơkong a Hngêi pơkeăng kân kơpong Tây Nguyên, nâ Nguyễn Thị Diện ối a bêng An Bình, pơlê kong krâm Ƀuôn Hồ tối ăm ‘nâi, klêi kơ’nâi 5 hâi pơlât, kuăn dêi nâ hiăng kơdroh tơngê, ivá hiăng chôa ‘lâng mo lĕm:

“Sap ing nah ôh tá tro, á tíu ngin ối mê iâ ngế tro tâ, iâ ngế tro tâ xua mê xuân ôh tá ‘nâi ôh há. Á vêh a hngêi ah á kô mơgrúa lĕm tâ, kơchăng tâ tung tơdroăng prôk lăm, lăm xah hêi’’.

Tiô ƀok thái pơkeăng Huỳnh Thị Bích Như, Khoa Nhi tổng hợp, Hngêi pơkeăng kân kơpong Tây Nguyên, sap ing apoăng hơnăm troh nôkố, khoa hiăng tơdah, pơlât ăm lối 85 ngế vâi hdrêng tro tâ pơreăng thĕn kŏng chêng rơkong. Tơtrŏng má môi tung dâng 1 khế ngiâ kố kơxô̆ mơngế mot pơlât a hngêi pơkeăng tâk hên.

Nôkố khoa dế pơlât 15 ngế tro tâ pơreăng thĕn kŏng chêng rơkong, tung mê, ai 2 ngế tro râ ó. Ƀok thái pơkeăng Huỳnh Thị Bích Như hnê tối ăm:

“Pin hbrâ mơdât ƀă troăng mơdêk ivá mơdât pơreăng ăm kuăn, ôu kâ tŭm trếo piê kơhiâm, ôu tŭm têa kô chiâng tơ’nôm mâu vitamin vâ mơdêk ivá kâi mơdât pơreăng ăm kuăn ƀă pin kal pâk mâu vaccine hbrâ mơdât pơreăng kơ-ôk ƀă hnê mơhno ăm kuăn mơgrúa kŏng xua kŏng chêng rơkong mơgrúa lĕm mê kô kơdroh tâ tú pơreăng’’.

Tiô Tíu xiâm mơdât pơreăng kong pơlê Dak Lak, riân sap apoăng hơnăm troh nôkố, lâp kong pơlê hiăng châ hlo lối 100 ngế tro tâ pơreăng thĕn kŏng chêng rơkong a 15 tơring, pơlê kong krâm, pơlê kong kơdrâm. Tung mê, ai 1 ngế hlâ. Dâng 1 khế ngiâ kố, mot a rơnó mêi, kơxô̆ mơngế tro tâ pơreăng thĕn kŏng chêng rơkong dế tâk, tơdâng 1 măng tĭng châ hlo sap ing 12 troh 15 ngế.

Vi ƀan kong pơlê Dak Lak hiăng tơbleăng mơ-éa kơxô̆ 4953, tơdroăng thăm hbrâ mơdât pơreăng kŏng chêng rơkong; kơvâ ngăn pơkeăng ƀă khăm pơlât hnê mơhno mâu khu pơkuâ ngăn pơkeăng ƀă khăm pơlât thăm séa ngăn vâ ‘nâi kơpong, xôh kơdê pơreăng; thăm pơtâng tối ‘na hbrâ mơdât pơreăng troh kuăn pơlê. Tơdrêng amê, tơrŭm ƀă Khu pơkuâ hnê hriâm ƀă Hnê mơjiâng tuăn ngôa rơkê ăm mâu hngêi trung hriâm troăng hbrâ mơdât pơreăng, mơdât pơreăng xông tâ tú.

Pôa Hoàng Hải Phúc, Kăn phŏ pơkuâ Tíu xiâm mơdât pơreăng kong pơlê Dak Lak tối ăm ‘nâi:

“Ngin tơbleăng ăm Khu pơkuâ ngăn pơkeăng ƀă khăm pơlât vâ hnê mơhno mâu tíu cheăng ƀă tơbleăng ăm kơvâ Hnê hriâm pơtâng tối 3 tơdroăng môi tiah kâ tô ôu chên, mơgrúa lĕm, xếo kŏng ƀă pêi pro 6 troăng ki Khu xiâm pơkuâ ngăn pơkeăng ƀă khăm pơlât pơchân tối laga kuăn pơlê xuân ối tơngôu. Ngin xuân tơrŭm ƀă kơvâ Hnê hriâm hnê mơhno ăm mâu hngêi trung drêng mâu vâi o tro thĕn kŏng chêng rơkong kô klâ kơtăn, pơtâng tối rơpŏng mơgrúa hngêi trăng, mơgrúa chêng kŏng rơkong drêng ôu kâ ƀă klêi kơ’nâi lăm mơdrah’’.