VOV4.Xơ Đăng - Tiô tơdroăng ki riân ngăn dêi Tí xiâm Hbrâ mơdât châi tamo kong pơlê Dak Lak, sap ing apoăng khế 10 troh nôkố, pơreăng tơngê lo mơheăm a kong pơlê hlo tâ tú rơ-iêo, kơxô̆ ngế tâ tâk hên ƀă pơtối ai mâu ngế ki hlâ xua tơngê lo mơheăm. Bu tung 10 hâi apoăng dêi khế 10 hiăng ai vâ chê 500 ngế tro pơreăng tơngê lo mơheăm, mơdêk tâi tâng kơxô̆ ngế tâ a hơnăm 2022 a Dak Lak troh lối 7 rơpâu ngế. Ki rơhêng vâ tối, sap ing apoăng hơnăm troh nôkố kong pơlê hiăng ai 2 ngế hlâ xua tơngê lo mơheăm.

Kăn ƀô̆ ngăn pơkeăng Dak Lak xôh pơkeăng vâ hbrâ mơdât pơreăng tơngê lo mơheăm tâ tú

Tiô pôa Hoàng Hải Phúc, kăn phŏ pơkuâ Tíu xiâm Hbrâ mơdât châi tamo kong pơlê Dak Lak, ƀă tơdroăng ki kong mêi ton tung mâu hâi hdrối kố nah a kong pơlê, tơdroăng tơngê lo mơheăm kô rế tâk tung la ngiâ. Vâ kdroh iâ tơdroăng mơngế tro tơngê lo mơheăm, kơvâ ngăn pơkeăng ƀă khăm pơlât Dak Lak hiăng mơdêk hnoăng cheăng hnê tối, mơdêk ki hlê plĕng ăm kuăn pơlê tung hbrâ mơdât pơreăng; Tơbleăng mâu tơdroăng ki pêi pro mơgrúa kong prâi tơnêi tíu, kơdê kiâ ngu ngĕng troh rêm thôn, pơlê, rơpŏng hngêi vâ hnê tối.

VOV Tây Nguyên/Tơplôu: Katarina Nga