VOV4.Xơ Đăng - Vâ tơniăn ivá ăm hok tro hriâm ối pơtê kơhâi dế a hngêi trung, kơvâ Hnê hriâm Dak Lak dế thăm pêi pro mâu troăng tơniăn mơgrúa lĕm kế kâ a mâu hngêi trung ai hơpiâp on ăm hok tro pơtê a hngêi trung kơhâi dế vâ kâ. Kong pơlê Dak Lak nôkố ai dâng 50 rơpâu ngế hok tro kâ kơhâi dế a 180 hngêi trung. Sap apoăng hơnăm hriâm Khu pơkuâ hnê hriâm ƀă hnê mơjiâng tuăn ngôa rơkê hiăng ai mơ-éa pơkâ mâu hngêi trung hriâm, mâu hngêi trung ai hơpiâp kâ, thăm pơkuâ ki krúa lĕm kế kâ. Hngêi kâ, canteen a mâu hngêi trung thế châ mơjiâng phuâng lĕm, tŭm ki bâ, ai bo péa klĭng tât krê vâ mơdât rối pruaqan, tri trôu ƀă ôa.

Hơpiâp tíu kâ hmê kơhâi dế a Hngêi trung râ má môi Ngô Quyền, pơlê kong kơdrâm Ƀuôn Ma Thuột (Tuấn Long xup)

Khu xuân hiăng tơrŭm ƀă kơvâ  khăm pơlât séa ngăn tơdroăng pêi tiô mâu pơkâ ‘na mơgrúa lĕm kế kâ ƀă tơkŭm kâ kơhâi dế ăm hok tro. Mâu hngêi trung drêng pêi pro tơdroăng kâ kơhâi dế a hngêi trung thế châ kơvâ khăm pơlât mơnhên tơdroăng mơgrúa kế kâ.

VOV TâyNguyên

A Sa Ly tơplôu ƀă tơbleăng