VOV4.Xơ Đăng - Tiô riân ngăn dêi Tíu xiâm séa ngăn hbrâ mơdat châi tamo kong pơlê Dak Lak, pơreăng tơngê lo mơheăm dế tâk rơdêi drêng môi măng tĭng ai dâng 400 ngế tro. Kố cho tơdroăng ki tối tơbleăng mơni kô ta tú dêi pơreăng tung la ngiâ gá hên. Bu riân krê tung 3 hâi achê kố (25-26-27/7) Dak Lak ai 200 ngế tâ ki nếo, tung mê ai 114 ngế tơngê lo mơheăm Dengue ki râ. Mơdêk tâi tâng kơxô̆ ngế tro pơreăng tơngê lo mơheăm a Dak Lak tâk troh 2.211 ngế, tâk 4,4 xôh tâng vâ pơchông ƀă khế kố hơnăm 2021.

Kơdê kiâ ngu ngĕng, kuăn kiâ ki pro chiâng pơreăng cho tơdroăng pêi pro tơƀrê má môi vâ hbrâ mơdât pơreăng tơngê lo mơheăm

Pơreăng tơngê lo mơheăm tâ tú a tâi tâng 15/15 tơring, pơlê krâm, pơlê kong kơdrâm, tung mê ai 3 to tơring ai kơxô̆ ngế tâ hên má môi cho Ea Súp, Krông Pač ƀă pơlê kong kơdrâm Ƀuôn Ma Thuột. Tiô pôa Hoàng Hải Phúc, kăn phŏ pơkuâ Tíu xiâm séa ngăn châi tamo kong pơlê Dak Lak tối, mơni pơreăng kô tâ tú hên a khế 8 ƀă khế 9, xua mê, rơtế ƀă mâu ivá mơ-eăm dêi kơvâ ngăn pơkeăng, rêm ngế kuăn pơlê kal mơdêk ki hlê plĕng, pêi pro tro mâu troăng hơlâ hbrâ mơdât pơreăng môi tiah mơgrúa lĕm kong prâi tơnêi tơníu, pro phuâng lĕm tíu ki têa hiu, klup mâu tơnâp kế tơmeăm xúa ki dâ têa, kơdê kiâ ngu ngĕng.

Katarina Nga tơplôu ƀă tơbleăng