Prôk tơkâ luâ 40 km vâ lăm troh a siêu thị a pơlê kong kơdrâm Ƀuôn Ma Thuột vâ rôe tơmeăm Têt,nâ Võ Thị Diệu Hương ối a tơring  Krông Pač ăm ‘nâi, ti lâi nâ vâ lăm prôk hơngế rôe tơmeăm Têt xua ôh tá hmiân tuăn ƀă tơmeăm ki tơbleăng tê nôkố a kơchơ:

“Tơmeăm tê a siêu thĭ gá hên túa ƀă hlối tơ’lêi vâ rôe xua gá ối a môi tíu  kô chiâng vâ rah xo ki lâi ki pin vâ. Ƀă nếo mot a siêu thị xuân tâ hmiân tuăn tâ há ‘na tơmeăm ki pêi pro lĕm tâ, xua tơmeăm tê a kơchơ pa kong xâu ai hên tơmeăm ki vâi mơjiâng pro oh tá ‘nâi xiâm kối ƀă tơmeăm ôh tá xê khât, mê vâlăm rôe tơmeăm tê a siêu thĭ tâ’’.

Xuân rĕng lăm rôe mâu tơmeăm Têt, nâ Nguyễn Thị Mai Hương ối a bêng Ea Tam, pơlê kong kơdrâm Ƀuôn Ma Thuột tối tiah kố, pơla kố ai hên chôu rah, séa ngăn tơmeăm nhên tâ, vâ ví lo tro rôe mâu tơmeăm ki ôh tá xê khât, ki ôh tá krá, ôh tá krúa lĕm:

“Ƀă kơchơ tê tơmeăm Têt á hlo hên hĭn ƀă hên túa, yă tê xuân hên túa yă sap rơpâ troh kơnâ. Tơdroăng pơkâ rah xo tơmeăm dêi  rơpŏng hngêi a hơnăm kố rah rôe tơmeăm mâ ngăn thế hlo lĕm ƀă hlối krúa lĕm há. Á xuân púi vâ mâu kơ koan khu râ pơkuâ cheăng mơnhên ngăn ‘na tơdroăng hôm pêi krúa lĕm kế kâ vâ ngin hmiân tuăn drêng rôe kâ’’.

Tê tơmeăm Têt Lo hơnăm nếo Giáp Thìn hơnăm kố, mâu khu mơdró, khu xing xoăng tơmeăm tê tung kong pơlê Dak Lak hiăng hbrâ hên tơmeăm, kĭ tơkêa tơhrâ ƀă mâu khu mơjiâng pro ki kuăn pơlê loi tơngah pêi krúa vâ rak tơniăn drêng rôe xúa mâu tơmeăm ki mê. Nâ Nguyễn Thị Em, ngế tê mơdró mâu tơmeăm pakĭng troăng Nguyễn Tất Thành, bêng Tân Lợi, pơlê kong kơdrâm Ƀuôn Ma Thuột  ăm ‘nâi:

“Tối tơdjuôm cho tíu tê mơdró rơpŏng hngêi tơná ki ai hên ngế hmâ rôe tung inâi kơchơ mơdró mê drêng rôe mâu tơmeăm vâ tê thế rah ngăn inhên, tơmeăm ki lâi ‘nâi lĕm krúa, ai tem tĕm chêh phĭu chêh hleăng nhên a mê nếo rôe, nôkố hên khu tơbriât siêu thị ai, bách hóa ai po hên hĭn mê pin thế tơtroh rah rôe tơmeăm ki lĕm krúa mê nếo châ tơ’mot hên ngế vâ rôe tơmeăm tơná tê’’.

Vâ tơniăn krúa kế kâ tung pơla hdrối Têt, tung pơla Têt ƀă klêi kơ’nâi Têt Lo hơnăm nếo, kong pơlê Dak Lak hiăng pơkâ mâu kơ koan ki rak ngăn mơdêk hnoăng cheăng séa ngăn ‘na tơmeăm hôp pro lĕm krúa kế kâ, hlối hnê ăm mâu tíu pêi cheăng, kong pơlê khu tơrŭm cheăng tơbleăng rĕng, séa ngăn nhên, pơxâu phak mâu khu, ngế ki mơjiâng pro, tê mơdró kế kâ ôh tá xê khât, ki ôh tá krúa lĕm. Mâu rơdroăng hnê tối tung hlá tơbleăng rơ’jíu  xuân châ kong pơlê mơdêk rơdêi vâ kum mơngế ki pêi pro, uâ pơliê pro, tê kơdró kế kâ hlê nhên hnoăng cheăng pêi tơná tung rak tơniăn krúa kế kâ, hlối kum mâu ngế ki rôe xúa hlê vâ rôe mâu kế kâ krúa tơniăn, mo lĕm ivá. Pôa Hoàng Văn Nghiã, Kăn phŏ séa ngăn ‘na tíu pêi chiâk deăng ƀă mơnhông thôn pơlê kong pơlê Dak Lak ăm ‘nâi:

“Ngin tơmâng séa ngăn mâu tơmeăm ki pêt hên xiâm ăm aTêt lo hơnăm nếo la ngiâ môi tiah mâu tơmeăm biêr, drôu, kơƀăn kĕo, hơ’nêh ƀă mâu kế kâ pro ing hơ’neh, kơchâi plâi pôm. Tung tơdroăng séa ngăn mê teăm tơdrêng châ ’nâi mâu tơdroăng pro xôi ‘na pơkâ tơniăn krúa kế kâ ƀă ngin kô pơxâu phak kơtăng ƀă mâu ngế ki lâi pro xôi luât. Ing tơdroăng séa ngăn mê hnê tối ăm mâu tíu mơjiâng pro tê mơdró mâu tơmeăm kế ki dâi lĕm ing mâu tơmeăm xo pêi apoăng pêi krúa ta troh mâu tơmeăm  vâ tê pro tiô tơdroăng pơkâ 1 pâ tiô pơkâ ‘na pro tơniăn krúa kế kâ’’.

Tơdroăng veăng tơmâng dêi khu râ kơvâ cheăng cho xiâm vâ ối rak tơniăn krúa kế kâ tung rôh Têt vâ chê troh. Mơhé ti mê, kuăn pơlê kal pêi pro mâu tơdroăng hnê tối hdrối dêi mâu kơ koan khu râ pơkuâ cheăng, rơkê tung tơdroăng rah xo tơmeăm rôe, bú rôe ƀă xúa kâ kế kân ki ‘nâi xiâm rêi mơjiâng pro, thế ngăn nhên vâi chêh hâi khế hơnăm ối chiâng kâ a kơtôu tơmeăm kế kâ.