Tiô tối tơbleăng dêi Tíu xiâm séa ngăn mơdât pơreăng (CDC) kong pơlê Dak Lak, tung kong pơlê nếo ‘nâi ai tơ’nôm môi ngê vâi hdrêng tro êi ngôa Nhật Bản. Kố cho ngế ki tro êi ngôa Nhật bản má 2 riân sap apoăng hơnăm 2023 troh nôkố. Ngế ki mê cho o kơnốu kot mâ hơnăm 2019 a cheăm Tân Tiến, tơring Krông Păč, kong pơlê Dak Lak. Hâi lơ 16/6, ngế hdrêng mê tơngê. Troh hâi lơ 19/6 , gá lo hêa, nôu pâ djâ pơlât a Hngêi pơkeăng tơring Krông Pač. Troh hâi lơ 20/6, ngế hdrêng châ pơtroh pơlât a hngêi pơkeăng kân kơpong Tây Nguyên vâ pơlât ƀă khăm ăm hlo châ gá hmếo pơ kơdrâ ôh tá ‘nâi xiâm ing lâi, séa ngăn nhên ‘na êi ngôa, séa ngăn ‘na mơheăm hôm tâ tú pơreăng.

Troh hâi lơ 23/6 klêi xét nghiêm MAC ELISA xua Tíu xiâm séa ngăn mơdât pơreăng Tây Nguyên tối ngế hdrêng mê yương tĭnh ƀă pơreăng IgM êi ngôa Nhật Bản. Nôkố ngế hdrêng xuân dế châ pơlât krâu khât a hngêi pơkeăng kân kơpong Tây Nguyên. Tiô ăm ‘nâi, ngế hdrêng ki mê hâi châ pâk vaccine mơdât pơreăng êi ngôa Nhật Bản.