Ƀok thái pơkeăng Trần Duy Dũng, kăn phŏ pơkuâ Hngêi pơkeăng kân kong pơlê Dak Nông ăm ‘nâi, tơdroăng tơdroăng ki ôh tá bê pơkeăng a hngêi pơkeăng hiăng ai sap ing hơnăm 2022 troh nôkố. Tung mê, kế ki truâ kŏng mơdât pơreăng, triăng ki pâk ‘mot têa, hơkê pâ, pơkeăng ƀă hên ki ê cho mâu kế tơmeăm ki kal.
‘Na xiâm kối chiâng ai tơdroăng kố, ƀok thái pơkeăng Dũng ăm ‘nâi, xua tơdroăng ki roê kế tơmeăm, tơbriât tê kế tơmeăm ôh tá tơniăn ƀă tơdroang ki ôh tá ai xếo ‘na tŏng kum klêi kơ’nâi hâi khế tro tơdjâk dêi pơreăng COVID-19. Hơnăm 2022, hngêi pơkeăng po 15 tơdroăng tê roê kế tơmeăm xúa tung khăm pơlât kơnâ 38 rơtal liăn, la bu ai 6 tơdroăng tê ƀă yă kơnâ dâng 10 rơtal liăn pêi pro ƀlêi chiâng.
Xua mê, ƀok thái pơkeăng Trần Duy Dũng pâ thế Khu ngăn pơkeăng ƀă khăn pơlât kong pơlê Dak Nông pro tíu xiâm, roê kế tơmeăm tơkŭm, ing mê kơdroh ki pá ăm kăn ƀô̆, mâu ngế cheăng ‘na khăm pơlât.
Viết bình luận