Dak Nông dế mơdêk rơdêi mâu tơdroăng pêi pro mơdât pơreăng tơngê lo mơheăm. Tơngê lo mơheăm hiăng tâ tú a tâi tâng 71 to cheăm, bêng, pơlê kân dêi kong pơlê Dak Nông. Tung mê ai tơring Dak Mil, Čư̆ Jút, Dak Song ƀă pơlê kong kơdrâm Gia Nghiã cho mâu tíu ki ai hên ngế tâ tú pơreăng tơngê lo mơheăm má môi. Tiô pôa Huỳnh Thanh Huynh, Kăn phŏ pơkuâ ngăn pơkeăng kong pơlê Dak Nông, pơreăng tơngê lo mơheăm tung kong pơlê  dế tâ tú ó, ai măng tĭng ki ‘nâ tâk troh 170 ngế tơngê.

Ƀok thái pơkeăng Hngêi pơkeăng tơring Dak Song dế khăm ngăn ivá kuăn pơlê ki tơngê lo mơheăm

Vâ mơdât ki tâ tú hên dêi pơreăng tơngê lo mơheăm, kơvâ ngăn pơkeăng pơlât dế mơdêk hnê tối ăm kuăn pơlê hlê plĕng; krếo thế mâu khu tơrŭm cheăng, mâu kăn hnê tối ăm kuăn pơlê kơhnâ trâ văng nhâ êa rơtôh tung kơdrum, hngêi, hơlâ, troăng, mơgrúa lĕm tơnêi tíu tâ tá, kơdê kiâ ngu ngĕng, ôa, tri trôu.