VOV4.Xơ Đăng - Hâi lơ 24/8, Vi ƀan kong pơlê Dak Nông tơkŭm po Leh ‘’Mơhnhôk pâk vaccine hbrâ mơdât COVID-19’’ hơnăm 2022. Tiô tơdroăng a leh mơhnhôk, troh nôkố hiăng ai lối 87% pơ’leăng mâ mơngế lối 18 hơnăm a Dak Nông châ pâk 3 trum vaccine hbrâ mơdât COVID-19, ƀă kố cho kong pơlê ai ngế pâk vaccine hbrâ mơdât COVID-19 ‘ló má 6 lâp tơnêi têa. Laga, tơdroăng pâk vaccine hbrâ mơdât COVID-19 a hên tíu a Dak Nông dế tot, ki má lối cho pâk trum má 2 ăm vâi hdrêng sap ing 5 hơnăm troh pá kơdâm 12 hơnăm, trum má 3 ăm vâi hdrêng sap ing 12 hơnăm troh pá kơdâm 18 hơnăm.

Dak Nông tơkŭm po ‘’Mơhnhôk pâk pơkeăng vaccine hbrâ mơdât COVID-19’’ hơnăm 2022

Tung leh mơhnhôk, Vi ƀan kong pơlê Dak Nông pơkâ mâu kơ koan tíu cheăng tung kong pơlê mơdêk pôu râng hnoăng cheăng, tơkŭm mơngế vâ pâk vaccine tŭm trum ăm vâi hdrêng sap ing 5 hơnăm troh pá kơdâm 12 hơnăm, tơniăn pêi kêi đeăng tung khế 8 kố; mơ-eăm kêi đeăng rĕng má môi tơdroăng pâk trum má 4 ăm kuăn pơlê sap ing 18 hơnăm tơngi klêng ƀă pêi pro rĕng pâk trum má 3 ăm mơngế sap ing 12 hơnăm troh pá kơdâm 18 hơnăm tiô hnê mơhno dêi Khu xiâm pơkuâ ngăn pơkeăng ƀă khăm pơlât ƀă tơniăn pâk vaccine.

A Sa Ly tơplôu ƀă tơbleăng