VOV4.Xơ Đăng - Hâi lơ 8/8, pôa Lê Văn Trì, kăn pơkuâ Tíu xiâm ngăn pơkeăng pơlât tơring Čư̆ Prông, kong pơlê Gia Lai mơnhên a tơring nếo ‘nâi ai môi ngế hlâ xua pơreăng kôk rơxok a pơlê kân Čư̆ Prông. Ngế ki hlâ mê cho Nguyễn Văn Trịnh (kot mâ hơnăm 1970, ối a tôh kơphô̆ 6, pơlê kân Čư̆ Prông). Pôa Trịnh ‘nâi dêi tơná tro pơreăng kôk rơxok a hâi lơ 18/7 ƀă mâu tơdroăng ki mơhno ăm ‘nâi cho xâu têa, xâu khía, xâu trâ eăng ƀă khăng kơbrĕn.

Drêng chó miếo kâ, kuăn pơlê kal rĕng lăm troh a tíu khăm pơlât ki achê má môi vâ pâk vaccine hbrâ mơdât pơreăng kôk rơxok

Hâi lơ 19/7, pôa Trịnh mot pơlât tung hngêi pơkeăng kân kong pơlê Gia Lai mê châ pơ’lêh troh a Hngêi pơkeăng Nhiệt đới Trung ương ƀă hlâ a hâi kơ’nâi mê. Tiô mơnhên dêi Tíu xiâm Hbrâ mơdât châi tamo kong pơlê Gia Lai, tung pơla môi hơnăm kố, pôa ôh tá tro chó miếo kâ. Laga, hdrối vâ ‘nâi tro pơreăng kôk rơxok 15 hâi, pôa Trịnh ai pin môi to miếo hlâ a kŏng djâ tâp kơđu (miếo hlâ tá hâi ‘nâi xua pơreăng kôk rơxok há lơ ôh).

Klêi kơ’nâi tâp, pôa Trịnh ôh tá pâk vaccine hbrâ mơdât kôk rơxok. Kố cho ngế ki hlâ má pŭn xua pơreăng kôk rơxok a kong pơlê Gia Lai riân sap ing hơnăm 2022 troh nôkố.

Katarina Nga tơplôu ƀă tơbleăng