VOV4.Xơ Đăng - Tung lối 1 khế achê kố, Hngêi pơkeăng pơlât vâi hdrêng kong pơlê Gia Lai hiăng tơdah pơlât ăm lối 800 ngế vâi ‘nĕng ki êi xôu, pá kâi hiâm, châ 1/3 tung tâi tâng mâu vâi ‘nĕng ki tro tâ riân sap ing apoăng hơnăm troh nôkố. A khoa Nội Tổng hợp - Y học cổ truyền (Hngêi pơkeăng kân kong pơlê Gia Lai) hiăng ai 163 to xoăng pơlât. Maluâ ti mê, troh a hâi kố, Kơvâ ki pơlât kố hiăng tơdah pơlât ai lối 200 ngế vâi hdrêng ki nếo, mê khoh athế tí tăng rôe tơ’nôm xoăng pơlât.

Ƀok thái pơkeăng a Hngêi pơkeăng kân Gia Lai dế khăm pơlât vâi hdrêng châi êi xôu

Tung kơxô̆ ki mê, ai vâ chê 80% mâu vâi hdrêng ki tro tâ mâu pơreăng ki tơdjâk troh xôu, môi tiah kơ-ôk, êi krôk, êi hâ tung troăng môh, châi êi xôu ƀă hên mâu tơdroăng châi ki ê ki hên hlo ai kơdrâm mâu vâi hdrêng pá kơdâm 5 hơnăm. Ƀok thái pơkeăng Từ Thị Mai Linh, Kăn phŏ pơkuâ ngăn Hngêi pơkeăng pơlât vâi hdrêng kong pơlê Gia Lai tối ăm ‘nâi: Rơnó kố  hmâ ai kong mêi tô ôh á tro rơnó, mê khoh tơ’lêi chiâng ai virus, pơreăng ki pro châi tamo. Peăng hngêi pơkeăng xuân hiăng hbrâ rơnáu mâu ƀok thái pơkeăng, xoăng pơlât vâ ăm mâu vâi hdrêng koi pơlât ƀă hnối châ khăm tro tiô tơdroăng vâ pơlât rĕng prêi. Tơdrêng amê, hbrâ ăm mâu pơkeăng, tơmeăm khoăng, kơmăi kơmok ki vâ kum pơlât châi êi xôu.

Nhat Lisa tơplôu ƀă tơbleăng