Tối hdrối tơbleăng a hneăng hôp, kơxô̆ mơngế hlâ xua pơreăng kôk rơxok tung lâp tơnêi têa riân sap apoăng hơnăm troh nôkố ai 64 ngế, a mâu kong pơlê ki hên, mê cho Gia Lai, Nghệ An, Điện Biên, Bình Phước. Tung mê, Gia Lai ai 11 ngế, cho kong pơlê ki ai kơxô̆ mơngế hlâ xua pơreăng kôk rơxok hên má môi tung lâp tơnêi têa, xuân đi đo ối tung top môi ‘na pơreăng kố tung mâu hơnăm hdrối.

Pơla sap hơnăm 2015 troh mơ’nui khế 9/2023, Gia Lai ai 44 ngế hlâ xua pơreăng kôk rơxok; 100% ngế tung lâp tơnêi têa hlâ tro  rơxok. Krê tung hơnăm kố, tung kơxô̆ 11 ngế hlâ xua pơreăng kôk, rơxok, ai 10 ngế ôh tá pâk vaccine klêi tro chó, miếo kâ, 1 ngế pâk la ôh tá tŭm liều. Tơdroăng hbrâ-mơdât pơreăng rơxok a Gia Lai nôkố dé trâm hên xơpá xua kơxô̆ ki pâk vaccine ăm chó miếo bú iâ; tơdroăng păn chó kơ’nêi hmâng vâ hên, ôh tá pêi pro tro mâu pơkâ tung rak ngăn kuăn kiâ ki păn ƀă xua kuăn pơlê ôh tá xâu, ôh tá  vâ tơmâng  pâk pơkeăng mơdât pơreăng ăm chó, miếo.

A hneăng hôp, mâu kăn châ tơmâng tối tơbleăng mâu tơdroăng ‘na: Tơdroăng pơreăng rơxok a mơngế a Việt Nam ƀă kơpong Tây Nguyên, xơpá pơloăng mơnúa ƀă mâu troăng rơhlâ; tơdroăng pơreăng rơxok ƀă mâu pơkâ hbrâ mơdât pơreăng rơxok a kuăn mơngế ƀă a kuăn kiâ a kong pơlê Gia Lai; mâu kăn xuân tơpui ‘na hên mâu tơdroăng rak ngăn ƀă mơdêk pâk vaccine a khu chó; mâu tơdroăng hbrâ mơdât rơxok a mơngế; hnoăng cheăng pêi dêi mâu kăn ƀă kơvâ cheăng ai tơdjâk troh a pơlê cheăm tơring...

 Ăm hlo ki ai khât tung tâi tâng chó dêi kong pơlê Gia Lai ai lối 210 rơpâu to ki hên cho kơ’nêi prôk hmâng vâ ƀă kơxô̆ chó pâk vaccine mơdât pơreăng rêm hơnăm pa xôp 10%. Tiê̆n sih Nguyễn Thị Thanh Hương, Ngế pơkuâ Bơrô Tơdroăng Mơdât ƀă Tah pơreăng kôk rơxok a kuăn mơngế, Khu xiâm ngăn pơkeăng tối tiah kố, tơdroăng cheăng hbrâ mơdât pơreăng kôk rơxok a kong pơlê kố ôh tá vâ tơmâng khât:

“Kal veăng tơmâng khât kơtăng, hnê mơhno pêi pro kơtăng dêi Vi ƀan kong pơlê Gia Lai ƀă mâu kơvâ cheăng khu grup, klêi mê hnê mâu tơdroăng pêi pro tung rak ngăn mâu chó, thế riân kơxô̆ chó tâi tâng a kong pơlê Gia Lai ai to lâi, ngăn ing kơxô̆ ki mê kô riân kơxô̆ ki pâk mơdât pơreăng rơxôk. Kơvâ ngăn pơkeăng pơlât mơnăn thế pâk hbrâ mơdât pơreăng troh kơlo 70% tung tâi tâng mâu chó mê Gia Lai kô châ vâ pêi  tơdroăng mơdât pơreăng rơxok a kuăn kiâ.

Drêng hiăng kâi mơdât pơreăng rơxok a kuăn kiâ kô kơdroh kơxô̆ mơngế tro chó miếo kâ. Ƀă kơvâ ngăn pơkeăng thế mơdêk pêi pro tro tâ nếo tơdroăng hnê tối pro ti lâi vâ tâi tâng mâu ngế tro chó miếo kâ thế lăm pâk vaccine mơdât pơreăng kok rơxok, kơvâ ngăn pơkeăng kô thế ai tŭm vaccine mơdât rơxok vâ mâu kuăn pơlê kô châ lăm pâk’’.

Tối tơbleăng a hneăng hôp, pôa Nguyễn Lương Tâm, Khu xiâm ngăn pơkeăng hbrâ mơdât pơreăng, Khu xiâm ngăn pơkeăng tối, pơreăng rơxok a Gia Lai đi đo tâk tiô tơrêm hơnăm, ăm hlo thế rĕng tơmâng khât tâ nếo dêi khu cheăng kal kí a kong pơlê. Kơvâ ngăn pơkeăng Gia Lai kal thế rĕng po rơdâ mâu tíu ki pâk vaccine dêi tơnêi têa, ki iâ gá rêm tơring, pơlê krâm, pơlê kong kơdrâm tung kong pơlê thế mơhno 1 tíu pâk vaccine dêi tơnêi têa.

Gia Lai xuân kal mơdêk kơxô̆ chó miếo ki pâk vaccine. Thế hnê tối tơtro vâ hbrâ mơdât pơreăng kôk rơxok a kuăn kiâ ƀă a mơngế, pâk mơdât pơreăng kôk rơxok ăm chó miếo ai tiô pơkâ 70% tung tâi tâng khu ki kong pơlê kơkâ... Pôa Nguyễn  Lương Tâm tối: 

“Kơvâ ngăn pơkeăng pơlât mơnăn thế rak ngăn krâu dêi mâu chó miếo dêi kong pơlê, mơdêk kơxô̆ chó miếo pâk mơdât pơreăng, ‘na kơvâ ngăn pơkeăng thế tối tơbleăng tung rơ’jíu hlá tơbleăng  tơtro vâ pro ti lâi kuăn pơlê drêng tro chó, miếo kâ vâ lăm pôu hngêi pơkeăng châ ƀok thái pơkeăng hnê tối, khăm ƀă pâk vaccine mơdât pơreăng rơxok.

Khu xiâm ngăn pơkeăng hbrâ mơdât pơreăng xuân hiăng ai hlá mơ-éa hnê mơhno pơtroh ăm mâu kong pơlê kơpong Tây Nguyên, malối Gia Lai mơjiâng khu séa ngăn sap ing kong pơlê troh tơring, cheăm, bêng vâ hbrâ mơdât pơreăng rơxok a mâu ngế ki tro chó miếo kâ. Xuân môi tiah peăng kơvâ ngăn pơkeăng pơlât mơnăn thế kâi séa ngăn mâu chó, malối mâu chó ki ối tung kơpong a chiâk  kơphế. Hnê tối ăm kuăn pơlê hdroâng kuăn ngo hlê ƀă rơkong tơná vâi vâ vâi hlê tâ nếo tơdroăng hbrâ mơdât pơreăng kôk rơxok’’.

Tiô tối tơbleăng dêi mâu ki rơkê a hneăng hôp, nôkố pơreăng kôk rơxok xuân hâi ai pơkeăng vâ pơlât prêi. Xua mê drêng virus rơxok mot tung troăng mơheăm xiâm ngôa mê kô rơ-iô ki tơ’lêi hlâ ai troh 100%. Túa hbrâ mơdât pơreăng ki xêt mê cho thế pâk vaccine hbrâ mơdât pơreăng kôk rơxok a mơnăn păn ƀă pâk vaccine mơdât kôk rơxok a mơngế ki tro chó, miếo kâ; ki xêt má môi cho thế pâk tung pơla 24 chôu klêi tro chó, miếo kâ.