Hơnăm hriâm kố, Hngêi trung râ má môi Nguyễn Viết Xuân, pơlê kân Nhơn Hòa, tơring Čư̆ Pưh, kong pơlê Gia Lai ai 804 ngế hok tro. Klêi kơ’nâi séa ngăn, kơxô̆ hok tro dêi hngêi trung veăng roê ƀaoh hiêm khăm pơlât bu châ 80%. Thái yăo Trịnh Minh Thắng, pơkuâ hngêi trung ăm ‘nâi, xua tơdroăng ki a cheăm ai nôu pâ lăm pêi cheăng hngế; mâu rơpŏng xơpá, hok tro cho hdroâng kuăn ngo nôu pâ tá hâi tơmâng khât troh tơdroăng ki roê ƀaoh hiâm khăm pơlât ăm kuăn ‘nĕng tơná.

“Hơnăm kố, kơxô̆ liăn roê ƀaoh hiâm khăm pơlât tâk hên tâ hơnăm hdrối, cheăng kâ rơpŏng hngei dêi hên rơpŏng hok tro a cheăm ối trâm hên xơpá. Hngêi trung hlo tơdroăng ki xơpá mê la xuân hiăng pơkâ mơ’no hên troăng hơlâ, tung rôh hôp nôu pâ hok tro hngêi trung trâm tơdrêng nôu pâ hnê tối ăm vâi hlo tơdroăng ki roê ƀaoh hiêm khăm pơlât kô pơxúa hên tơdroăng ăm hok tro ƀă pơlê pơla”.

Tung kơxô̆ 23 to hngêi trung a tơring Čư̆ Pưh mê bu ai 5 toăng  hngêi trung châ lối 90% ngế hok tro roê ƀaoh hiêm khăm pơlât. Xiâm kối bro kơxô̆ ngế hok tro roê ƀaoh hiêm khăm pơlât iâ cho xua kơxô̆ hok tro, sinh viên châ tơnêi têa tŏng kum ăm ƀaoh hiêm khăm pơlât kơdroh, drêng cheăm, thôn hiăng hluăn ing rơpŏng malối xơpá.

Pôa Nguyễn Hữu Hưng – Kăn phŏ pơkuâ ƀaoh hiêm Pơlê pơla tơring Čư̆ Pưh, kong pơlê Gia Lai, ăm ‘nâi tơ’nôm:

 “Mâu ngế ki roê ƀaoh hiêm khăm pơlât tung mâu hơnăm kố nah kơdroh hên, xua tro tơdjâk dêi Pơkâ 612 (QĐ Vi ƀan Hdroâng kuăn ngo) ‘na kơdroh kơpong, hluăn ing kơpong, xua mê mâu vâi o hok tro a kơpong kố kơdroh tiô há, tung mê, ki xiâm cho mâu vâi o hdroâng kuăn ngo. Xua mê, kơxô̆ ngế veăng roê ƀaoh hiêm khăm pơlât cho hok tro dêi tơring Čư̆ Pưh bu châ 81%”.

Xuân môi tiah mê, tơdroăng ki roê ƀaoh hiêm khăm pơlât tung hok tro a tơring Čư̆ Sê xuân trâm hên xơpá. Maluâ hok tro hdroâng kuăn ngo châ tơnêi têa tŏng kum 60% kơxô̆ liăn nâp roê ƀaoh hiêm khăm pơlât la xuân ối dâng 2.700 ngế o tá hâi roê.

Jâ Ngô Thị Hiền, Kăn phŏ pơkuâ ƀaoh hiêm Pơlê pơla tơring Čư̆ Sê, kong pơlê Gia Lai ăm ‘nâi, kơxô̆ hok tro, sinh viên roê ƀaoh hiêm khăm pơlât a tơring bu nếo châ 86%.

“Khu pơkuâ ngăn mâu hngêi trung, khu pơkuâ tơdroăng kal kí a cheăm ƀă kơ koan ƀaoh hiâm pơlê pơla hiăng tơrŭm lăm troh a mâu thôn, pơlê ƀă a mâu lâm hriâm vâ hnê tối, mơhnhôk la nôu pâ hok tro pơrá tối tiah kố, rơpŏng xơpá ôh tá ai liăn roê ƀaoh hiêm khăm pơlât ăm mâu vâi muăn. Laga, hơnăm hriâm 2023 – 2024, ngin hiăng tí tăng ‘nâi plĕng ăm Vi ƀan hnê ngăn tơring hnê mơhno mâu Khu hnê mơhno mâu cheăm, mâu hngêi trung ƀă kơvâ hnê hriâm vâ tơbleăng roê ƀaoh hiêm khăm pơlât ăm hok tro, mơ-eăm khŏm châ tâi tâng hok tro veăng roê”.

Tiô riân ngăn dêi ƀaoh hiêm pơlê pơla kong pơlê Gia Lai, nôkố kơxô̆ hok tro, sinh viên roê ƀaoh hiêm khăm pơlât bu nếo châ dâng 90%. Kong pơlê ối vâ chê 22 rơpâu ngế hok tro, sinh viên tá hâi ai liăn vâ roê ƀaoh hiêm khăm pơlât. Tơdroăng kố chiâng tơdjâk troh ki pơxúa ăm mâu vâi o tâng ôh tá mơhúa trâm mâu tơdroăng ki châi tamo pâ thế nâp hên liăn tung pơla khăm pơlât.