VOV4.Xơ Đăng - Nôkố mâu hngêi pơkeăng râ kong pơlê pơlât tơngê lo mơheăm a Gia Lai dế lối hâ ho xua kơxô̆ mơngế tro tâ pơreăng tơngê lo mơheăm đi đo châ pơtroh pơlât ing mâu hngêi pơkeăng tơring. Tung kơxô̆ 3.608 ngế tơngê lo mơheăm kong pơlê Gia Lai châ hlo sap apoăng hơnăn troh hâi lơ 21/8 mê ai troh 70 ngế tơngê lo mơheăm thế mot koi pơlât, tung mê, ai lối tơdế kơxô̆ mơngế mot pơlât cho ing mâu hngêi pơkeăng tơring to a hngêi pơkeăng râ kơpêng.

Nôkố, Hngêi pơkeăng kân kong pơlê Gia Lai, Hngêi pơkeăng pơlât vâi hdrêng Gia Lai, Tíu xiâm khăm pơlât pơlê kong kơdrâm Plei Ku hiăng ‘măn vâ chê 50% xoăng koi pơlât vâ pơlât mâu ngế tơngê lo mơheăm, ki hên cho mâu ngế ing mâu hngêi pơkeăng tơring pơtroh pơlât a hngêi pơkeăng râ kơpêng.

Kơxô̆ vâi hdrêng pơlât tơngê lo mơheăm a Hngêi pơkeăng pơlât vâi hdrêng Gia Lai dế hên tâng pơchông ƀă mâu ngế tro tơdroăng châi ki ê

Tiô mâu ƀok thái pơkeăng, hơnăm kố Type virus hên tâ mâu hơnăm hdrối, pro chiâng châi râ tâ hên hơnăm hdrối. Khu ƀok thái pơkeăng Gia Lai pơtối pơtroh khu ƀok thái pơkeăng ƀă pơkeăng, tơmeăm, xoăng koi pơlât vâ pơlât ăm mâu ngế châi tamo.

A Sa Ly tơplôu ƀă tơbleăng