Tơkŭm po sap hâi lơ 9/5 troh tâi hâi lơ 12/5, Khu pơkuâ cheăng pêi – Mô đô̆i rong – Rêh ối pơlê pơla kong pơlê Gia Lai tơrŭm ƀă Hngêi pơkeăng Hoàn Mỹ Đà Nẵng tơkŭm po rah khăm tê kơtê ăm vâi hdrêng a kong pơlê Gia Lai. Tung mâu hâi hiăng hluâ, mâu ƀok thái pơkeăng hiăng rah khăm, hnê mơhno ăm vâ chê 400 ngế vâi hdrêng a Gia Lai ai châi plâi nuih sap ing pơxiâm rơneh môi tiah: hmâ kơ-o, kơ-o rơdêng pơtối ai hên xôh, hiâm rĕng, nuih kơhlong drêng hrik hiâm, êi xôu, tơxui xâu, vâi hdrêng tro châi plâi nuih sap ing kot mâ tá hâi châ rah khăm.

Ƀă vâi hdrêng hiăng châ pâ pơlât mê krếo troh vêh khăm séa ngăn ivá. Tiô tối hdrối, troh tâi hâi lơ 12/5, mâu ƀok thái pơkeăng kô rah khăm ăm dâng 1.000 ngế vâi hdrêng tung lâp kong pơlê. Klêi kơ’nâi mâu vâi o châ rah khăm ƀă ai pơkâ pâ pơlât, kô châ tŏng kum kơxô̆ liăn pâ pơlât tiô pơkâ.