Nam: Ahdrối, pó vâi krâ nhŏng o ƀă pú hmâ tơmâng tơdroăng ‘na hbrâ mơdât pơreăng COVID-19 tung chal nếo.

Nữ: Tung tơdroăng tơpui hâi kố, ngin tối ‘na tơdroăng COVID-19 ƀă tơdroăng hbrâ, mơdât pơreăng COVID-19 tung chal nếo.

Nam: Nôkố cho tơdroăng xiâm ki nhên:

Nữ: Châ hlo a kong têa Sinuâ mơ’nui hơnăm 2019, COVID-19 rĕng chiâng pơreăng ki kân pro lâp plâi tơnêi ôh tá tơniăn. Troh nôkố, pơreăng hiăng pro hlâ lối 6,5 rơtuh ngế tung kơxô̆ mê lối 600 rơtuh ngế tro tâ.

Lâp plâi tơnêi hiăng kơtâu tơ’noăng vâ mơjiâng pro mâu pơkeăng vaccine ƀă troăng pơlât vâ kơdroh kơxô̆ mơngế tro tâ râ ƀă hlâ xua COVID-19. Kơnôm mâu tơdroăng mơ-eăm mê troh nôkố hiăng châ tơƀrê hên ăm hlo lâp plâi tơnêi hiăng kâi mơdât pơreăng.

Laga, tơ’lêi ai xông tâ tú pơreăng ki nếo dêi virus SAR-CoV-2 xuân u ối amê. Xua mê, mâu kong têa kal pơtối pâk vaccine tŭm ăm mâu khu ki tơ’lêi xông tâ tú ƀă pơtối khăm ngăn vâ mơdât tơdroăng ki tâ tú dêi virus. Tiô Khu xiâm ngăn pơkeăng ƀă khăm pơlât lâp plâi tơnêi, khế 10 kố mâu ngế rơkê dêi Khu tơrŭm ngăn pơkeăng ƀă khăm pơlât lâp plâi tơnêi kô pơkâ ngăn pơreăng kân COVID-19 hôm ối tơdroăng ki thâ ‘na tơdroăng cheăng khăm pơlât lâp plâi tơnêi lơ ôh.

Nam: Tơkâ hluâ hneăng pá puât ƀă hên tơdroăng châi hiâm xua pơreăng kân COVID-19 pro, troh nôkố Việt Nam hiăng châ mơdât pơreăng kân COVID-19 tung hneăng nếo ‘’kâi trâng tơniăn, ƀeăn ƀĕng, mơdât châ tơƀrê pơreăng COVID-19’’. Pakĭng tơdroăng pơtối po rơdâ pâk tâi tâng vaccine hbrâ mơdât COVID-19 ăm kuăn pơlê, pâk trum má 3, trum má 4 ƀă hía hé vâ pro xiâm rêi krá tơniăn, tơnêi têa pin xuân pro pơhôi chôa ‘lâng mâu troăng hbrâ mơdât pơreăng vâ tơtro tâ ƀă chal nếo, kum pro tơ’lêi hlâu pro tơniăn cheăng kâ.

Pin hiăng pơtê lôi tối tơbleăng tơdroăng ƀă ƀok thái pơkeăng, tơdrêng amê ôh tá pơklât kơdroh tơkŭm kơdrâm mơngế ƀă rak kơtăn. Nếo achê kố cho tơdroăng ki pơ’lêh ‘na pơkâ pơklât pâng rơkong môh a tíu rêh ối tơdjuôm. Hdrối nah, kên pâng rơkong môh cho tơmeăm ôh tá chiâng păng lôi ƀă kuăn pơlê rêm roh lo ing hngêi mê nôkố bu u ối mơngế ki tro tâ pơreăng ƀă mâu tíu ki pơklât thế pâng rơkong môh vâ hbrâ mơdât pơreăng COVID-19. Tơdroăng pơtâng hnê tối 5k xuân châ pơ’lêh chiâng 2K+ (pâng rơkong môh + xôh pơkeăng kơdê pơreăng+ vaccine+ô pơkeăng + pơlât + kŏng ngê̆ + hlê plĕng dêi kuăn pơlê ƀă hía hé).

Nữ: Tơnêi têa pin hiăng pêi pro pâk pơkeăng vaccine châ lối 258 rơtuh kung kếo pơkeăng vaccine hbrâ mơdât pơreăng COVID-19 ƀă cho môi tung mâu kong têa ai kơxô̆ vaccine xúa ƀă kơxô̆ ki pâk vaccine hên má môi tung lâp plâi tơnêi. Kơnôm châ pâk ăm kuăn pơlê tâi tâng, pin hiăng kâi troh mơdât pơreăng. Laga, ƀă tơdroăng ki tâ tú dêi pơreăng ki nếo rế tâk pơxiâm hlo nhên sap ing khế 7/2022. Tơdrêng amê, mâu khế hdrối mê rêm hâi tơnêi têa pin bu châ hlo 500 – 700 ngế, mê troh khế 7 kơxô̆ kố tâk troh 1.000 ƀă troh nôkố cho dâng 2.900 ngế. Tâng pơchông ƀă khế 7, kơxô̆ mơngế tro tâ nếo COVID-19 tung khế 8 tâk 2,4 xôh, ai 24 ngế hlâ tâk 18 ngế.

Kơxô̆ mơngế ki tro tâ ki râ, hlâ xuân hlo tâk hên. Sap apoăng khế 9 troh nôkố, bu ai 2 hâi tơnêi têa pin ôh tá ai ngế hlâ xua COVID-19, ki ê rêm hâi 1 – 2 ngế, ai hâi troh 5 ngế hlâ. Khu xiâm pơkuâ ngăn pơkeăng ƀă khăm pơlât đi đo chêh tơbleăng mâu hlá mơ-éa ki kal pơkâ mâu kong pơlê thăm rĕng pâk vaccine, thăm pêi pro mâu troăng kơdroh hlâ mơngế ƀă hía hé.

Nam: A Dak Lak, tơdroăng pơreăng COVID-19 tung pơla kố nah xuân ai pơreăng xông tâ tú ó. Tiô riân dêi Tíu xiâm mơdât pơreăng kong pơlê Dak Lak, bu krê tung hneăng 3, kong pơlê châ hlo lối 1.300 ngế tro tâ COVID-19.  Tơtrŏng má môi, kơxô̆ mơngế tro tâ tâk rĕng tung khế 9, tung khế 9 Dak Lak xuân châ hlo 4 ngế hlâ xua COVID-19.

Nữ: Vâ mơdât tơdroăng tâ tú dêi pơreăng COVID-19, Dak Lak hiăng thăm pêi pro tơdroăng pơtâng tối xuân môi tiah thăm pâk vaccine hbrâ mơdât COVID-19 ăm kuăn pơlê. Pơtối mê, troh hâi lơ 25/9, Dak Lak hiăng pâk tâi tâng trum má 1 vaccine hbrâ mơdât COVID-19 ăm khu ngế sap ing 5 hơnăm tơngi klêng. Trum má 2 ƀă trum vêh pâk roh 1 ăm mâu ngế sap ing 12 hơnăm tơngi klêng xuân châ hên lơ tơ’nôm ƀă tâng pơchông ƀă tơdâng tơdjuôm lâp tơnêi têa. Laga, kơxô̆ vêh pâk roh má 2 ăm khu lối 18 hơnăm ƀă trum má 2 ăm vâi hdrêng 5 troh pá kơdâm 12 hơnăm ối hrá ƀă châ iâ bu châ dâng cho 66% ƀă 44%.

Nam: Tung hâi lơ 24/9 pơla kố nah, Vi ƀan kong pơlê Dak Lak hiăng tơkŭm po Leh mơhnhôk tơdroăng pơtâng tối hbrâ mơdât pơreăng COVID-19 tung rơxông nếo ƀă dó inâi ‘’Xua môi Việt Nam krá tơniăn ƀă mo rơdêi’’ ƀă pâk vaccine hbrâ mơdât COVID-19 ăm vâi hdrêng sap ing 5 troh pá kơdâm 18 hơnăm. A Leh mơhnhôk, khu râ kăn pơkuâ kong pơlê Dak Lak mơnhên, kong pơlê pơtối khŏm pêi pro mâu troăng hbrâ mơdât pơreăng COVID-19 ƀă 03 tơdroăng ki xiâm mê cho: khăm ngăn, klâ ăm ối kơtăn, pơlât. Tơdrêng amê pơkâ mâu khu cheăng, kơvâ cheăng, đoân theh, mâu kơ koan cheăng, khu tơrŭm cheăng ƀă kuăn pơlê rơtế dêi pó pêi pro, pơtối pêi pro kơtăng tơdroăng pơtâng hnê tối 2K mê cho: Ki pâng rơkong môh, xôh pơkeăng kơdê pơreăng hlối pâk vaccine, pơkeăng, tơdroăng pơlât, xúa kŏng nghê̆, hlê plĕng dêi kuăn pơlê ƀă mâu troăng pêi ki ê. Rơtế ƀă mê kơbông krếo tâi tâng kuăn pơlê veăng  môi tuăn pâk vaccine hbrâ mơdât COVID-19, kum thăm pêi pro rĕng tơdroăng pâk vaccine ăm vâi hdrêng sap ing 5 troh pá kơdâm 18 hơnăm.

Dak Lak pâk vaccine hbrâ mơdât COVID-19 (um pơtro)

Nữ: Pó vâi krâ nhŏng o ƀă pú hmâ nếo klêi tâng tơdroăng ‘na hbrâ mơdât pơreăng COVID-19 tung rơxông nếo. Tơdroăng kố xua Kơ koan teăng mâ Rơ’jiú Việt Nam kơpong Tây Nguyên tơrŭm ƀă Khu pơkuâ hdroâng kuăn ngo kong pơlê Dak Lak chêh.

VOV Tây Nguyên/Tơplôu: A Sa Ly