VOV4.Xơ Đăng - Hâi lơ 24/7, Khu xiâm ngăn pơkeăng pơlât hôp tơdrêng ƀă mâu ki rơkê tung tơnêi têa ƀă kong têa ê ‘na tơdroăng pơreăng lo kơtuâ ‘mêi to. Rôh hôp hiăng môi tuăn tối troh hâi lơ 24/7/2022, Việt Nam hâi hlo ai ngế ki lâi tro pơreăng lo kơtuâ ‘mêi to. Laga, nhôm tơ’lêi tâ tú a tơnêi têa pin  pơreăng kố, xua pơreăng hiăng hlo tâ tú a hên mâu kong têa, tơdroăng lăm trâm mâ dêi rơpó tơ’lêi hlâu ƀă mơni kố rế tâk pơla Việt Nam ƀă mâu kong têa tung lâp plâi tơnêi, tung kơpong.

Khu xiâm ngăn pơkeăng hiăng pơtroh hlá mơ-eá ăm Vi ƀan mâu kong pơlê, pơlê kong kân ‘na mơdêk séa ngăn pơreăng lo kơtuâ ‘mêi to; hbrâ rơnáu mâu pơkeăng, tơmeăm khăm ngăn ki ăm ‘nâi nhên khât, ‘nâi nhên tơdroăng châi, mâu Tíu xiâm ngăn pơkeăng kong pơlê mơdêk hnoăng cheăng séa ngăn khăm ngăn nhên ngế ki lâi nhôm a tíu tê mơdró tơkăng kong, a hngêi pơkeăng  cheăm bêng ƀă tơkŭm hnê tối vâ kuăn pơlê hlê ‘na pơreăng lo kơtuâ ‘mêi to ƀă mâu tơdroăng hbrâ mơdât pơreăng pơtân.  

Gương tơplôu ƀă tơbleăng