Kơxo lơ 2/11, Khu xiâm ngăn pơkeăng ƀă khăm pơlât po Rôh hôp Khoa hok ƀă Kong ngê̆ hơnăm ối nếo kơvâ pơkeăng rôh má 21. Rôh hôp kố ai veăng dêi 42 tíu pêi cheăng, mê cho mâu hok viê̆n, hngêi trung đăi hok, kao đăng Y dươk lâp tơnêi têa; hngêi pơkeăng sap ing râ kong pơlê, tơngi klêng, hngêi pơkeăng krê sap ing hạng 2 tơngi klêng ƀă mâu viê̆n hriăn ngăn ƀă hên ki ê. Tung kơxô̆ 272 hlá mơ-éa tối tơbleăng khoa hok châ pơchuât, ai 132 hlá mơéa pơchuât ƀăng nâl Ănglê.

Khu xiâm ngăn pơkeăng tơkŭm po Rôh hôp Khoa hok ƀă kong ngê̆ hơnăm ối nếo kơvâ pơkeăng

Kố cho rôh vâ ôu eăng mâu thái cô, mâu khu ki hriăn ‘na khoa hok ƀă kăn ƀô̆ tung ƀă kơvâ cheăng ki ê hiăng ai mâu tơdroăng veăng kum kân kĭn ăm tơdroăng cheăng hnê mâu ngế cheăng ‘na khăm pơlât. Pakĭng mâu rôh hôp tối tơbleăng khoa hok, hơnăm ối nếo kơvâ ngăn pơkeăng ối tơkŭm po rôh tơpui tơno “Hnoăng cheăng dêi mâu rơxông hơnăm ối nếo kơvâ ngăn pơkeăng Việt Nam tung lâp plâi tơnêi”. Tơdroăng kố kô kum mơdêk tơrŭm, tơkŭm khu ki ai tuăn ngoâ rơkê hriăn ngăn khoa hok kum ăm mâu tơdroăng cheăng pơlê pơla tung tơnêi têa ƀă a kong têa ê.