VOV4.Xơ Đăng - A kong pơlê Kon Tum sap ing hên hơnăm hdrối mê hía nah, hiăng ai tơdroăng ki mâu ƀok thái pơkeăng, thái pơkeăng ki pêi cheăng a mâu hngêi pơkeăng pâ phep lo pơtê cheăng. Ƀă mâu kong pơlê ối kơpong kong ngo ki ối trâm hên xahpá, môi tiah Kon Tum, tơdroăng ki ôh tá ai mơngế, maluâ mơngế ki rơkê plĕng hên ‘na kơvâ pơkeăng ƀă khăm pơlât dế ối cho tơdroăng ki tô tuăn ó khât. Drêng hlo ai tơdroăng ki păng ‘nâng kố, kong pơlê Kon Tum xuân hiăng ai troăng hơlâ vâ pơtối rak vế khu khăm pơlât a mâu hngêi pơkeăng.

Riân ing hơnăm 2018 troh nôkố ai 59 ngế ƀok thái pơkeăng hriâm râ đăi hok pêi cheăng a mâu hngêi pơkeăng cheăm dêi tơnêi têa dêi tung kong pơlê Kon Tum pâ pơ’lêh cheăng ki ê, ‘nâ pâ pơtê cheăng. Krê 6 khế apoăng hơnăm a Kong pơlê Kon Tum kố xuân hiăng ai 3 ngế ƀok thái pơkeăng 1 ngế dược sĩ hiăng pơtê tơdroăng cheăng ‘na khăm pơlât dêi hngêi pơkeăng tơnêi têa.

Jâ Huỳnh Thị Hồng, Kăn Hô̆i đong kong pơlê Kon Tum tối tô tuăn hlo mơngế pêi cheăng hiăng ton hơnăm lo pơtê cheăng, hriâm troh lâm kân há, tro ‘na kơvâ ngăn pơkeăng hiăng plui tah dêi ếo pơkeăng ôh tá vâ pêi cheăng xếo:

“Hngêi pơkeăng kân kong pơlê Kon Tum ing ối má II to má I kân rơdâ ai 750 to xoăng koi pơlât kal thế rak tơniăn ‘na mơngế khăm pơlât. Ƀok thái pơkeăng ƀă mâu ngế cheăng khăm pơlât pâ pơtê cheăng ki ‘nâ pâ pơ’lêh cheăng a kơpong tơ’lêi hlâu tâ vâ cheăng ton hơnăm pro chiâng rế pá ai tŭm mơngế ki rơkê cheăng khăm pơlât, malối a hngêi pơkeăng tơnêi têa’’.

Ƀok thái pơkeăng Hngêi pơkeăng kân kong pơlê Kon Tum tơvâ tơvân tơdroăng cheăng khăm pơlât kuăn pơlê

Tiô pôa Lê Ngọc Tuấn, Kăn hnê ngăn Vi ƀan kong pơlê Kon Tum, ki xiâm pro chiâng ai rêm hơnăm lối 14 ngế ƀok thái pơkeăng, dược sĩ pâ pơ’lêh tíu cheăng, tơdroăng pâ pơtê cheăng cho ing kơxô̆ liăn pêi lo iâ ƀă tơdroăng a tíu pêi cheăng ôh tá lĕm, ôh tá tơniăn. Ki khât ăm hlo kơxô̆ liăn kâ bú iâ, tâng vâ pơchông ƀă mâu tíu pêi cheăng a mâu hngêi pơkeăng krê, xuân môi tiah a mâu kong pơlê ki ê. Xua mê, tiô pôa Ngọc Tuấn vâ rak chêng mâu ngế cheăng khăm pơlât kal thế ai troăng rơhlâ pêi pro tah ki xơpá ăm mâu ki pêi cheăng a hngêi pơkeăng tơnêi têa.

“Vâ rak chêng mâu ƀok thái pơkeăng thế mơdêk kơxô̆ liăn khế kâ ăm mâu ƀok thái pơkeăng ki dế pêi cheăng a hngêi pơkeăng tơnêi têa. ‘No liăn rôe tơmeăm khoăng, hbrâ tơmeăm pêi cheăng vâ pro tíu pêi cheăng ăm mâu ngế pêi cheăng a mê tơniăn tâ. Ai tơdroăng tŏng kum, luât pơkâ tŏng kum hnê hriâm ƀă thế mơdêk hnoăng ki pơkuâ rơdâ tâ ăm mâu tíu pêi cheăng ngăn pơkeăng khăm pơlât dêi tơnêi têa vâ pro tơ’lêi hlâu mơdêk kơxô̆ liăn pê lo ăm mâu ƀok thái pơkeăng ki dế pêi cheăng tung kơvâ cheăng’’.

Mâu ngế cheăng ngăn pơkeăng pơlât kong pơlê Kon Tum tung mâu hâi ki tô tuăn tơ-brêi tơbrêh xua pơreăng kân COVID-19

Xuân tiô pôa Lê Ngọc Tuấn, kăn hnê ngăn Vi ƀan kong pơlê Kon Tum, hlo tơdroăng ki ai khât mâu ngế ngăn pơkeăng, ƀok thái pơkeăng cheăng a hngêi pơkeăng tơnêi têa pâ pơ’lêi tíu pêi cheăng ƀă pâ pơtê cheăng, hơnăm 2020 Khu ngăn Đảng ủy Kon Tum hiăng ai troăng rơhlâ pêi ahdrối ƀă mâu kăn ƀô̆ kŏng chưk kơvâ cheăng ngăn pơkeăng drêng hriâm klêi chuyên khoa I, chuyên khoa II châ kum ăm lăm hriâm tơ’nôm ing kơxô̆ liăn ngân tơnêi têa.

Vi ƀan kong pơlê Kon Tum xuân hiăng pơkâ Tơdroăng tơkêa bro mơnhông  mơdêk mơngế cheăng dêi kong pơlê troh hơnăm 2030, ƀă mâu tơdroăng vâ pêi troh hơnăm 2050, tung mê, troăng rơhlâ vâ mơnhông mơdêk mơngế cheăng rơkê rế hên ăm kơvâ cheăng khăm pơlât. La ga, ki khat ăm hlo, mâu troăng rơhlâ, luât pơkâ vâ rak mơngế dêi kơvâ cheăng dêi Kon Tum xuân hâi châ tơbleăng pêi tơ-brê ƀă ôh tá tơdâng tơ’mô mê xuân ối hên tơdroăng kăn ƀô̆, mâu ngế pêi cheăng khăm pơlât pâ pơ’lêh tíu cheăng, ‘nâ pâ pơtê cheăng ôh tá vâ cheăng khăm pơlât a hngêi pơkeăng tơnêi têa.

Khoa Điềm chêh

Gương tơplôu ƀă tơbleăng