Ƀok thái pơkeăng Nguyễn Hữu Thâm, Ngế pơkuâ Kơbong Túa pơkâ Tơkŭm, Hngêi pơkeăng pơlât mâ Kon Tum ăm ‘nâi, sap ing apoăng khế 9 troh nôkố rêm hâi ai 20 ngế châi mâ khêi troh khăm, pơlât a hngêi pơkeăng ki hên cho mâu vâi hdrêng tung hơnăm hriâm.

Tiô tơdroăng ki hnê pơchân dêi kơvâ ngăn pơkeăng, vâ hbrâ mơdât pơreăng châi mâ khêi mê athế đi đo jiếo kŏng ƀă kơ-ƀŏng; hơ’răng kŏng pôi tá pêi a rơkong, a mâ, a môh; pôi tá xúa kế ki xah hêi tơdjuôm; mơgrúa lĕm dêi mâ, môh krôk rêm hâi ƀă têa po ƀă mâu pơkeăng ki tiê tung mâ, tiê krôk ki hmâ xúa rêm hâi; xúa kơ-ƀŏng lơ mâu trếo ki kơdê pơreăng, tâm ƀă pơkeăng mâu kế ki xúa, kế tơmeăm xúa dêi ngế ki tro; kơdroh ối a chê ƀă ngế ki tro pơreăng lơ ngế ki châi mâ khêi.