Pêi pro tiô pơkâ kơxô̆ 05 hơnăm 2023 dêi Chin phuh, kong pơlê Kon Tum ai 1.296 ngế cheăng ngăn pơkeăng veăng kum, ngăn pơkeăng pơlê cheăm - tơring - kong pơlê châ ’mâi hơ’lêh kơlo kâ liăn khế ki tơ’nôm tơdroăng cheăng  sap kơlo 40-70% tâk 100%. Hâi khế pơkâ ăm kâ sap lơ 1/7/2022 troh hâi lơ 31/12/2023 ƀă tâi tâng kơlo liăn ki ăm kâ mê lối 68 rơtal liăn.

Ƀok thái pơkeăng Võ Văn Thanh, Ngế pơkuâ ngăn pơkeăng pơlât kong pơlê Kon Tum ăm ‘nâi, Khu xiâm ngăn pơkeăng hiăng pâ thế ‘na tơdroăng ăm 270 ngế cheăng ngăn ‘na pơkeăng pơlât ki pêi hnoăng cheăng ‘na kơxô̆ mơngế- ngăn ‘na ai kuăn preăng kuăn iâ râ tơring, râ cheăm ƀă mâu ngế pêi hnoăng cheăng veăng hnê tối ăm kuăn pơlê rak vế ivá mo lĕm a Tíu xiâm Séa ngăn mơdât pơreăng cheh ‘mot inâi vâi tung khu châ ‘mâi hơ’lêh kơlo liăn ăm kâ tơ'nôm cheăng xua ki khât gá, mâu ngế ki mê tung tơdroăng cheăng hbrâ mơdât pơreăng COVID-19 nah xuân hiăng veăng pêi hên tơdroăng cheăng hbrâ mơdât pơreăng môi tiah mâu ngế cheăng ngăn ‘na pơkeăng pơlât a cheăm, tơring há.