Tơmiat troh tơbâ 76 hơnăm hâi Mố đô̆i rong râ, hlâ hía, Kŏng ti pêi cheăng tiô rơnó môi tung khu 715 (Ƀinh đoân 15) tơkŭm po khăm ivá rêm khế  ƀă hbru pơkeăng tê kơtê ăm kŏng nhân, mâu ngế pêi cheăng dêi tíu cheăng kố ƀă mâu ngế ai hnoăng tơnêi têa a mâu cheăm tơkăng kong dêi kong pơlê Gia Lai.

Po sap ing hâi lơ 20 troh 27/7, Hngêi pơkeăng Khu lêng ƀă kuăn pơlê – Kŏng ti pêi cheăng tiô rơnó môi tung khu 715 hiăng khăm rah ngăn ăm 1.200 ngế kŏng nhân, kăn pơkuâ chi ƀô̆, krâ pơlê, ngế pơkuâ thôn, ngế ki châ kuăn pơlê loi tơngah, mố đô̆i tro rong, mố đô̆i châi tamo, mâu rơpŏng ai hnoăng a mâu cheăm Ia O, Ia Kha, Ia Chía (tơring Ia Grai, kong pơlê Gia Lai) vâ rĕng châ ‘nâi tơdroăng châi vâ teăm châ pơlât tơdrêng.

Klêi khăm, hbru pơkeăng tê kơtê châ Kŏng ti 715 tơkŭm po rêm hơnăm ƀă ki xiâm cho pêi pro tro mâu tơdroăng ki klâ xoăng, mơnhên tối ivá ăm kŏng nhân, mâu ngế pêi cheăng tiô pơkâ. Tơdrêng amê hlối tiâ mơnhên ivá, pơlât ăm mâu ngế ki tro rong, mố đô̆i ki châi tamo, mơdêk tơdroăng rêh ối. Drêng kố, Kŏng ti 715 ối tơkŭm po diâp 300 kơxuô tơmeăm ăm mâu ngế ki ai hnoăng tơnêi têa a tơring Ia Giai.