VOV4.Xơ Đăng - Kong pơlê Lâm Đồng dế mơdêk rĕng tơdroăng ki pâk vaccine COVID-19 tá tung hâi pơtê mơ’nui măng tĭng ƀă rôh leh pơla kố nah.

Nôkố Lâm Đồng ai dâng 130 rơpâu klŏng vaccine tá hâi pâk. Ví tơdroăng ki vaccine kố tâi hâi pơkâ xúa, kong pơlê Lâm Đồng pơkâ thế kơvâ ngăn pơkeăng ƀă khăm pơlât dêi kong pơlê pơkâ thế mâu tíu pêi cheăng ki ai tơdjâk rĕng tơkŭm pâk vaccine COVID-19 ăm kuăn pơlê tá tung mâu hâi mơ’nui măng tĭng ƀă mâu rôh pơtê leh.

Lâm Đồng dế mơdêk pâk vaccine COVID-19 ăm vâi hdrêng

Tung mê, tơkŭm pâk tŭm trum ăm vâi hdrêng sap ing 5 troh pá xôp 12 hơnăm, pêi klêi tơdroăng ki pâk trum má 3 ăm mơngế sap ing 12 hơnăm tơngi klêng ƀă pâk trum má 4 ăm kuăn pơlê sap ing 18 hơnăm tơngi klêng. Rak vế rôh pâk vaccine COVID-19 kố kô pâk klêi hdrối hâi lơ15/9 la ngiâ. Tiô pôa Nguyễn Văn Bôn, kăn phŏ ngăn tíu xiâm ngăn pơkeăng ƀă khăm pơlât tơring Đơn Dương, kong pơlê Lâm Đồng, ai mâu kuăn pơlê ối ai tơdroăng ki ôh tá vâ pâk ăm vâi hdrêng, xua mê tíu pêi cheăng kố dế tơrŭm ƀă khu kăn pơkuâ tơkŭm mâu khu ki hnê tối troh rêm thôn pơlê vâ mơhnhôk kuăn pơlê.

Katarina Nga tơplôu ƀă tơbleăng