VOV4.Xơ Đăng - Kong pơlê Lâm Đồng dế trâm ƀă tơdroăng ki mơni pơreăng tơngê lo mơheăm kô xông tâ tú drêng tâi tâng kơxô̆ ngế tâ hiăng tâk lối 2 rơpâu ngế. Troh nôkố, kong pơlê Lâm Đồng hiăng ai lối 2 rơpâu ngế tro pơreăng tơngê lo mơheăm, tâk lối 1.500 ngế tâng pơchông ƀă khế kố hơnăm nah. Tung pơla mê, kong pơlê kố dế pơxiâm mot tung rơnó kong mê hngê mê mơni tơdroăng ki pơreăng xông tâ tú dêi pơreăng tơngê lo mơheăm gá hên.

Lâm Đồng dế mơdêk hnoăng cheăng hbrâ mơdât ƀă pơlât pơreăng tơngê lo mơheăm

Pôa Trịnh Văn Quyết, kăn phŏ ngăn pơkeăng ƀă khăm pơlât Lâm Đồng ăm ‘nâi, rơtế ƀă tơdroăng ki mơdêk hnoăng cheăng hnê tối kuăn pơlê pêi pro tro mâu troăng hơlâ hbrâ mơdât, kơvâ ngăn pơkeăng ƀă khăm pơlât kong pơlê xuân dế tơbleăng hên troăng hơlâ hbrâ mơdât ƀă pơlât. Tâi tâng mâu tíu khăm pơlât a kong pơlê pơrá pơkâ tơdroăng pêi pro ki nhên ƀă rak vế hbrâ rơnáu kế tơmeăm, pơkeăng vâ hbrâ rơnáu pơlât ăm mâu ngế ki tro pơreăng.

Tơdrêng amê hlối tơbleăng mâu troăng hơlâ vâ drêng châ ‘nâi mâu tíu ki ai pơreăng nếo mê vê hdró kơpong ƀă hbrâ mơdât teăm tơdrêng.

Katarina Nga tơplôu ƀă tơbleăng