Dế ‘nân tơkôm pro hlá mơ-éa khăm a Hngêi pơkeăng pơlât Mâ kong pơlê Dak Lak, o Tôn Nữ Yến Nhi, hok tro lâm 11, hngêi trung râ má pái Ea Hleo, tơring Ea Hleo tối ăm ‘nâi, tung lâm ai hên pú hmâ châi mâ ƀă pâ pơtê hriâm, o xuân châi khêi mâ 3 hâi kố, hiăng rôe pơkeăng kơto mâ laga ôh tá prê, xua mê nếo troh hngêi pơkeăng vâ pơlât:

“Tâ drêng riu koi mê péa pâ mâ môi tiah gá tro krêa dêi pó, ôh tá kâi ối ôh. Hâi kố á troh khăm mê ƀok thái pơkeăng tối á kơto pơkeăng a mâ to lâi hâi kô kơdroh ƀă thế klâ ôh tá xúa tơmeăm tơdjuôm ƀă mơngế tung rơpŏng hngêi’’.

Ƀă lối 800 ngế hok tro dế tiô hriâm, bu klêi kơ’nâi leh pơxiâm po mot hơnăm hriâm nếo, hngêi trung râ má môi Lý Tự Trọng, pơlê kong kơdrâm Ƀuôn Ma Thuột hiăng châ hlo 156 ngế hok tro pơtê hriâm xua châi khêi mâ. Krê sap ing hâi lơ 11/9 troh nôkố hngêi trung châ hlo 139 ngế o hok tro, tro châi khêi mâ ƀă tơdế tung kơxô̆ mê xuân ối lăm hriâm.

Cô Lương Thị Bích Nguyên, kăn pơkuâ hngêi trung tối ăm ‘nâi, hên hok tro châi mâ laga xuân ối lăm hriâm xua mê pơreăng tâ tú rĕng tâ. Hngêi trung hiăng hnê mơhno khu khăm pơlât hbrâ têa po sinh lĭ vâ kơto a mâ kal tơdrêng ăm mâu vâi o hok tro; thăm mơgrúa hngêi trung lâm klêi kơ’nâi rêm roh hriâm; tơdrêng amê pơchân tối nôu pâ hok tro, hok tro drêng tro tâ pơreăng châi khêi mâ kal pơlât prêi a hngêi vâ ví tơdroăng ki tâ tú ăm dêi pó.

“Ai môi nôu pâ hok tro xua tơdroăng rêh ối pá puât thế pêi cheăng a hơngế xua mê tơdroăng lôi kuăn a hngêi ôh tá tơ’lêi hlâu xua mê thế djâ kuăn troh hngêi trung, xua mê tơdroăng tâ tú tung hngêi trung ôh tá chiâng vâ ví mơhé ngin hiăng ai mâu troăng pơkâ mâu vâi o thế truâ mâ nhĕng vâ rak vế mâ, pơkâ thế mơgrúa lĕm lâm hriâm, mơgrúa châ chăn ƀă hnê mơhno mâu vâi o tung tơdroăng bâu mâ môi tiah lâi ăm châ tơƀrê’’.

Hngêi trung Mầm non Hoa Lan, bêng Tân Tiến, pơlê kong kơdrâm Ƀuôn Ma Thuột ai 2 hngêi trung kuăn, ƀă dâng 200 ngế vâi hdrêng dế tiô hriâm a 10 lâm. Hdrối mê dâng 1 khế, hngêi trung châ hlo mâu ngế tro tâ u tâi u tá, laga to lâi hâi ngiâ kố tơdroăng vâi hdrêng châi khêi mâ hlo rế tâk hên, ƀă 20 ngế vâi hdrêng tro tâ.

Cô Lê Thị Liên, kăn pơkuâ hngêi trung mầm non Hoa Lan tối ăm ‘nâi, nôkố hngêi trung dế mơdêk tơdroăng pơtâng tối ƀă hnê mơhno thái cô, hok tro pêi pro kơtăng mâu troăng hbrâ mơdât tiô pơchân dêi kơvâ khăm pơlât:

“Tơdroăng mơgrúa tung hngêi trung thế pêi pro apoăng. Má môi tơmeăm mơgrúa dêi vâi hdrêng mê vâi hdrêng thế xúa krê; má péa nếo cho mâu tơmeăm tung lâm hriâm mê cô thế mơgrúa, xoh pơkeăng kơdê pơreăng; má pái nếo cho mâu muăn xếo kŏng tro tiô pơkâ. Drêng châ hlo muăn tro châi khêi mâ mê hngêi trung klâ kơtăn ôh tá ăm muăn ki mê ối tơkŭm xếo. Drêng muăn châi khêi mâ mê ai tơdroăng tơrŭm ƀă hngêi pơkeăng ƀă nôu pâ hok tro vâ pơlât ƀă muăn”.

Tiô ƀok thái pơkeăng Lê Dương Thùy Linh, Kăn phŏ pơkuâ Hngêi pơkeăng pơlât mâ Dak Lak, pơreăng châi khêi mâ mê a Dak Lak ai hên sap ing khế 8. Laga dâng 2 măng tĭng achê kố, kơxô̆ mơngế tro tâ pơreăng tâk hên. Nôkố tơdâng 1 hâi, Hngêi pơkeăng tơdah khăm ăm sap ing 200 – 300 ngế, ki hên cho hok tro. Ƀok thái pơkeăng Linh tối ăm ‘nâi, pơreăng châi khêi mâ hmâ tâ tú tơdrêng ing têa hế, mâu têa ing mâ, môh dêi ngế tro tâ ing tơmeăm xúa krê, kế xah, kế râng a kŏng tro tâ pơreăng, têa tro tâ pơreăng, ki má lối cho têa a mâu klôh klê têa, tíu klê têa ƀă hía hé.

“Roh pơreăng xông tâ tú dêi hơnăm kố cho râ, pakĭng châi a kêt mạc mâ mê virus hơnăm kố hiăng mot tung giác mạc mâ drêng hiăng êi mê gá mot tung kuăn ngé mâ pro kơdroh ki xáu hlo, mâu ngế ki rôe xêh pơkeăng kơto a mâ kô pro chiâng tơlŏng giác mạc mâ. Tơdrêng amê drêng tâ virus roh kố mê ngế châi khêi mâ kô tơngê, kô êi troăng hiâm, mê ai pro ôh tá tơniăn troăng klêa.

Nôkố tá hâi vaccine hbrâ mơdât pơreăng ƀă xuân ôh tá ai pơkeăng kơto mâ vâ hbrâ xua mê kuăn pơlê pôi tá rôe xêh pơkeăng vâ hbrâ mơdât pơreăng ƀă drêng châi khêi mâ thế troh hngêi pơkeăng pơlât ‘na mâ vâ châ khăm ƀă tối tơdroăng khăm pơlât’’.

Xuân tiô mâu ƀok thái pơkeăng, châi khêi mâ cho pơreăng ki ôh tá tơdjâk ‘mêi ƀă kô prêi lĕm xêh sap ing môi troh 2 măng tĭng; tâng râ mê kô ton 1 khế. Laga, tâng rĕng pơlât ƀă tro troăng mê mâu ngế châi khêi mâ kô rĕng prêi ƀă kơdroh tơdroăng ki chiâng châi ki ê.