Tiô tơdroăng ăm ‘nâi dêi Tíu xiâm hbrâ mơdât pơreăng châi tamo kong pơlê Dak Lak, sap ing apoăng hơnăm troh nôkố, lâp kong pơlê hiăng ai vâ chê môi rơpâu ngế tro pơreăng tơngê lo mơheăm, tung mê ai 1 ngế hlâ. Kơxô̆ ngế tro tơngê lo mơheăm châ ‘nâi sap ing apoăng khế 7 troh nôkố cho vâ chê 500 ngế, ƀă tâi tâng kơxô̆ ngế tro a kong pơlê tung 6 khế apoăng hơnăm.

Tung mê, ôh tá iâ ngế ki tro mê mot pơlât tung hngêi pơkeăng hiăng râ. Pái tơring ki ai kơxô̆ ngế tro pơreăng tơngê lo mơheăm hên má môi mê cho tơring Ea Hleo, tơring Ea Kar ƀă pơlê kong kơdrâm Ƀuôn Ma Thuột.

Pôa Hoàng Hải Phúc, Kăn phŏ pơkuâ Tíu xiâm hbrâ mơdât châi tamo kong pơlê Dak Lak ăm ‘nâi, xiâm kối chiâng ai hên ngế tro pơreăng tơngê lo mơheăm a tơring cho xua kuăn pơlê ôh tá vâ hmâng tung tơdroăng ki hbrâ mơdât. Drêng tro pơreăng hmâ roê xêh pơkeăng ôu, pơlât a hngêi, pro pơreăng chiâng pá vâ pơlât, mê ah chiâng hlâ.