Tiô tíu xiâm hbrâ mơdât châi tamo kong pơlê Gia Lai, sap ing apoăng hơnăm troh nôkố, lâp kong pơlê hiăng ai lối 1.400 ngế tro pơreăng tơngê lo mơheăm ƀă 507 tíu ki ai pơreăng. Mâu ngế ki tâ pơreăng tơngê lo mơheăm mê tâk hên sap ing khế 5 ƀă hlối ton troh nôkố xua mot tung rơnó mêi cho rôh tơ’lêi ăm mâu tri trôu ai kơtâ, xông kân.
Nôkố kong pơlê ối ai dâng 80 tíu ki ai pơreăng tơngê lo mơheăm tá hâi kâi hbrâ mơdât. Tíu xiâm hbrâ mơdât châi tamo kong pơlê Gia Lai hiăng mơjiâng khu ki pêi hnoăng cheăng tơrŭm ƀă mâu tơring hnê mơhno kơtăng hnoăng cheăng hbrâ mơdât pơreăng tơngê lo mơheăm. Tơrŭm ƀă mâu tơring cheăm hnê mơhno kuăn pơlê, malối cho mâu cheăm ki dế ai pơreăng ƀă xôh pơkeăng a mâu kong prâi tơnêi tơníu môi tiah ok tâi mâu kong kếo ki ai têa, bro mơgrúa lĕm tơnêi tơníu. Tơrŭm ƀă tíu xiâm ngăn pơkeăng ƀă khăm pơlât tơring tơbleăng xôh pơkeăng a mâu tíu ki ai pơreăng, pôi tá ăm pơreăng xông tâ tú rĕng.
Viết bình luận