Pơl hdrối kô nah, Hneăng hôp rôh má 4, hneăng hơnăm 2023-2028 dêi khu ƀok thái pơkeăng hơnăm ối nếo kong pơlê Dak Lak hiăng pơkâ ki xiâm mê cho: Pơtối rak vế pêi pro tơdroăng pleăng hneăng tơná xua rak vế ivá kuăn pơlê; mơdêk pêi hên mâu tơdroăng cheăng “Thái pơkeăng hơnăm ối nếo a mâu pơlê cheăng. Ƀă tơdroăng pêi pro “Thái pơkeăng hơnăm ối nếo Dak Lak pêi pro tiô rơkong Pôa Hồ, pleăng hnoăng tơná xua rak vế ivá kuăn pơlê”, tung hneăng ki nếo, Khu ƀok thái pơkeăng hơnăm ối nếo kong pơlê Dak Lak pơtối rak vế pêi pro hnoăng cheăng dêi khu ing mâu tơdroăng hriâm, pơtâp, mơdêk hlê plĕng; pơtối rak ki rơkê plĕng tung tơdroăng hriĕn plĕng ‘na khoa hok ƀă mơdêk tơdroăng cheăng pleăng hnoăng tơná xua vâ rak vế ivá kuăn pơlê.

Ƀok thái pơkeăng Phan Thành Trinh, Kăn hnê ngăn Khu ƀok thái pơkeăng hơnăm ối nếo kong pơlê Dak Lak hneăng má 4 ăm ‘nâi:

“Khu ƀok thái pơkeăng hơnăm ối nếo Dak Lak pơtối pêi mâu tơdroăng kal dêi tơná ƀă 3 tơdroăng kal ƀă 3 tơdroăng ki xiâm, ki hên tơkŭm a mâu tơdroăng cheăng dêi ƀok thái pơkeăng hơnăm ối nếo xua tơdroăng rêh ối dêi kuăn pơlê; pơtối rak vế hnoăng cheăng pêi ahdrối dêi tơná a tơrêm kong pơlê tung kơpong. Ƀă hnoăng cheăng dêi mâu khu ƀok thái pơkeăng hơnăm ối nếo a mâu tơring tung la ngiâ kô rơdêi tâ, mâu vâi ngoh nâ kô pơtối rak vế pêi pro hnoăng cheăng dêi tơná a pơlê cheăm tơná rak ngăn’’.

Khu ƀok thái pơkeăng hơnăm ối nếo kong pơlê Dak Lak nôkố ai 16 chi hô̆i ƀă vâ chê 1.000 ngế cho mâu ngế cheăng khăm pơlât, ƀok thái pơkeăng hơnăm ối nếo dế pêi cheăng a mâu hngêi pơkeăng cheăm, tơring, kong pơlê ƀă a mâu hngêi pơkeăng krê tung kong pơlê. Tung 5 hơnăm hdrối, rêm râ khu ƀok thái pơkeăng hơnăm ối nếo tung kong pơlê hiăng pêi hên tơdroăng pleăng hnoăng cheăng tơná xúa ivá kuăn pơlê, tơkŭm po 120 rôh khăm pơlât, hnê rak vế ivá, xoăng pơkeăng tê kơtê ăm 86 .000 ngế kuăn pơlê ƀă kơxô̆ liăn lối 4,2 rơtal liăn; hnê hriâm vâ hlê tơdroăng pơlât tơdrêng hdrối vâ djâ a hngêi pơkeăng hnê ăm rơpâu ngế thái cô mâu hngêi trung mầm non, hngêi trung râ má môi tung lâp kong pơlê.

Tơkŭm po Hâi jiếo kŏng ƀă kơƀŏng; pơtâp hnê rak vế ivá ngế nôu drêng mơhum kuăn ăm mâu ngế hơnăm ối nếo, hbrâ mơdât pơreăng ăm rơpâu ngế hok tro, sinh viên. Tơbleăng tơdroăng kum mâu ngế châi tamo a 14 to hngêi pơkeăng tung lâp kong pơlê. Tơdrêng amê, Khu kố ối tơkŭm po tơdroăng pleăng hnoăng tơná a kong têa Kul vâ khăm pơlât, hnê kuăn pơlê rak vế ivá hlối xoăng pơkeăng tê kơtê ăm kuăn pơlê, hbru rơxế mái ăm hok tro kơtiê xơpá.

Mơ’nui hơnăm 2023 kố nah, a pơlê kong xiâm Hà Nội, Khu ƀok thái pơkeăng hơnăm ối nếo Việt Nam hiăng tơkŭm pêi tơdroăng “pơ’lêh kơxô̆ xúa rak mo lĕm xôu” khăm, rah ngăn vâ ‘nâi ngế ki lâi tro ŭm xôu ƀă mâu tơdroăng ‘na xôu. Tơdroăng khăm rah mê xúa kơmăi kơmok ki dâi lĕm xua mâu ƀok thái pơkeăng dêi hngêi pơkeăng khăm ăm. Ƀă tơdroăng khăm ngăn tâi tâng, xup X-quang, siêu âm, vê ngăn điện tim, điện tâm đồ, khăm ngăn troăng mơheăm, xét nghiệm têa nŭm, ngăn rơmâ tung mơheăm... Ƀă hên tơdroăng khăm ki ê châ kuăn pơlê hâk mơnê. Môi ngế ki châi tamo khăm mê tối:

“Á châ khăm ngăn kơtêi ƀă xo mơheăm vâ mơnúa ngăn, mê nôkố a dế tơkôm xup xôu, klêi mê ối siêu âm nếo, a vâ môi tuăn ƀă tơdroăng khăm tiah kố. Mơnê Tơnêi têa hiăng tơmâng khât troh kuăn pơlê’’.

Kố cho tơdroăng khăm tê kơtê vâ teăm ‘nâi ngế ki lâi tro pơreăng ŭm xôu ƀă mâu tơdroăng châi ki ê ‘na xôu, veăng kum khăm rak ngăn ƀă pơlât teăm tơdrêng, kơdroh hlâ mơngế, kơdroh tơdjâk troh tơdroăng ‘na ivá ƀă veăng rak tơniăn tung rêh ối, mơdêk tơdroăng ối mo lĕm châ ăm kuăn pơlê Việt Nam. Ƀok thái pơkeăng Hà Anh Đức, Ngế pơkuâ ƀơrô, Khu xiâm ngăn pơkeăng, Kăn hnê ngăn Khu ƀok thái pơkeăng hơnăm ối nếo Việt Nam ăm ‘nâi:

“Tơdroăng khăm rah vâ rĕng ‘nâi, rĕng châ hlo, teăm pơlât kô kum ăm mơngế châi tamo ai ivá rêh ton tâ, tơdroăng rêh ối châ mơnhông tơƀrê ƀă xuân kum kơdroh kơxô̆ liăn ki  pơlê pơla thế pôu. Khu ƀok thái pơkeăng hơnăm ối nếo ngin vâ tối mê thế ai môi tơdroăng khăm ngăn nhên, kum kơdroh kơxô̆ liăn, pêi tơƀrê pơxúa má môi, mơngế ki châi tamo châ xúa ƀă kăn ƀô̆ ngăn pơkeăng xuân pêi tro hnoăng cheăng pơkâ, châ ‘nâi tro tơdroăng châ vâ pơlât teăm tơdrêng’’.

Tơdroăng “Hơ’lêh kơxô̆ xua ivá mo xêi lĕm xôu khăm rah ngăn apoăng vâ ‘nâi ôm ai ngế tro ŭm xôu a 5 to kong pơlê, pơlê kong kân tung hơnăm 2023 ƀă 2024. Tơdroăng pơkâ khăm rah tê kơtê vâ rah ngăn hôp ai ŭm xôu ƀă mâu tơdroăng châi ki ê ‘na xôu ăm lối 50.000 ngế kuăn pơlê. Hdrối mê, tơdroăng khăm châ tơbleăng khăm a pơlê kong kân Hồ Chí Minh, nôkố tơdroăng pơtối tơbleăng a mâu Pơlê kong kân Hà Nội, Cần Thơ, Đà Nẵng ƀă kong pơlê Thừa  Thiên Huế, ƀă veăng ai vâ chê 1.000 ngế cheăng khăm pơlât, ƀă  ƀok thái pơkeăng.