VOV4.Xơ Đăng - Hâi lơ 4/8, jâ Đào Hồng Lan, Pôu râng hnoăng Ngế xiâm pơkuâ ngăn pơkeăng ƀă khăm pơlât pơkuâ djâ hiăng ai roh pêi cheăng ƀă kong pơlê Dak Lak. Tiô tơbleăng, tung mâu hơnăm hiăng hluâ, tơdroăng khăm pơlât tung kong pơlê Dak Lak hiăng pơ’lêh nhên, tơdroăng khăm pơlât, tơmeăm khăm pơlât hiăng kum kal khât tung tơdroăng mơdât pơreăng ing tíu cheăng a pơlê, cheăm.

Jâ Đào Hồng Lan, pôu râng hnoăng Ngế xiâm pơkuâ ngăn pơkeăng ƀă khăm pơlât xông tơpui a roh pêi cheăng

‘Na tơdroăng hbrâ mơdât pơreăng, nôkố Dak Lak dế ai 40 pơreăng ki tâ tú, tung mê ai 10 pơreăng kơdroh, 2 pơreăng dế tâk, 27 pơreăng xuân ối ai tâng pơchông ƀă roh kố hơnăm 2021. Tung mê, 2 túa pơreăng dế xông tâ tú ó cho pơreăng COVID-19 ƀă pơreăng tơngê lo mơheăm. Xông tơpui a roh pêi cheăng, jâ Đào Hồng Lan, pôu râng hnoăng Ngế xiâm pơkuâ ngăn pơkeăng ƀă khăm pơlât tối, tơdroăng pơreăng dế xông tâ tú ó, xua mê khu râ kăn pơkuâ kal pơtối hnê mơhno nhên tung tơdroăng hbrâ, mơdât pơreăng, ví lôi ai tơdroăng ai hên pơreăng.

‘Na tơdroăng pâk vaccine hbrâ mơdât COVID-19, Dak Lak cho 1 tung 4 kong pơlê ai kơxô̆ mơngế vêh pâk iâ má môi lâp tơnêi têa, xua mê kong pơlê kal thăm pơtâng tối vâ kuăn pơlê môi tuăn veăng pâk pơkeăng vaccine hbrâ mơdât pơreăng.

A Sa Ly tơplôu ƀă tơbleăng