Nâ Phan Thị Bích Thảo, ôi a pơlê kân Ia Kha, tơring Ia Grai, kong pơlê Gia Lai ai kuăn ối 3 hơnăm apoăng gá tơngê hmân, hmôu pơ koi mê rơpŏng hngêi djâ vâi ‘nĕng lăm khăm a hngêi pơkeăng ki pơlât vâi hdrêng kong pơlê Gia Lai vâ pơlât. Laga,  klêi kơ’nâi mê muăn tơngê rế râ, hlối rĕng thế djâ pơlât tơdrêng a hngêi pơkeăng kân kơpong Tây Nguyên, kong pơlê Dak Lak.

Klêi 8 hâi pơlât ngăn krâu khât, troh nôkố hdrêng hiăng chía tâ iâ, ivá dế chôa mo lĕm. Tơmiât troh tơdroăng ki muăn tơngê apoăng drêng djâ lăm pơlât tơdrêng, nâ Thảo hâi teăm tâi ki ối rơxá:

“Muăn pơlât akố xua lo thĕn kŏng chêng rơkong râ má 3, muăn hlối ai tơdroăng châi plâi nuih, vâ tối châ gá péa ngiât tâi, hiăng khăng. Troh akố châ mâu ƀok thái pơkeăng rĕng tơmâng khât teăm pơlât tơdrêng. Vâ tối cho kuăn á nôkố  hiăng tơkâ luâ rôh ki rơ-iô. A hlo préa ‘nâng, kuăn á gá hơ‘lêh tơngê râ rĕng ‘nâng ƀă ôh tá hlo ăm pin ‘nâi hdrối tơdroăng klâi, ôh tá hlo lo ki klâi a kŏng chêng, muăn bú tơngê tê ƀă lo thĕn tung rơkong’’.

Xuân tro thĕn kŏng chêng rơkong ki râ pơlât a Kơvâ Hồi sức cấp cứu Nhi - Nhi Sơ sinh Hngêi pơkeăng kân kơpong Tây Nguyên, nâ Hồ Thị Phương ối a bêng Thống Nhất, pơlê kong krâm Ƀuôn Hồ, kong pơlê Dak Lak xuân hâi tâi ki kơdrâ tô tuăn drêng muăn kơdrâ rế tơngê râ. Nâ Phượng ăm ‘nâi, hdrối nah muăn ki kân tâ dêi nâ hiăng tro pơreăng thĕn kŏng chêng rơkong há la ôh tá râ to lâi, bú lo pơtong iâ a chêng, kŏng, ối to a hngêi pik pơkeăng tê klêi mê gá prêi xêh, mê muăn ki má 2 tro pơreăng kố, rơpŏng hngê xuân tô tuăn ó ‘nâng:

“Muăn ki rơmúa xuân lăm pôu pơlât a ƀok thái pơkeăng, mê, ƀok thái pơkeăng hnê thế ôu pơkeăng 2 hâi ah prêi, hdrối nah ga chía tâ ôh tá ‘nhó râ, nôkố râ ‘nâng, luâ tâ hdrối nah. Hlo rơ-iô ‘nâng, xâu lơ tơdjâk troh ngôa, tâng ôh tá teăm djâ pơlât hngêi pơkeăng râ kơpêng tơdrêng mơni kô ôh tá kâi tơkâ luâ’’.

Dế roăng rak kuăn kơdrâi ki nếo 6 khế a Khoa Nhi Tổng hợp, Hngêi pơkeăng kân kơpong Tây Nguyên, nâ Huỳnh Thị An ối a cheăm Čư̆ Mlanh, tơring Ea Sup, kong pơlê Dak Lak ăm ‘nâi, kơtăn kố ôh tá châ 1 măng tĭng, nâ hlo dêi kuăn kơ-o hên, rơlâi rơlo, tơngê hmân ƀă a kơpeăng kŏng, chêng, rơkong ối hlo ai pơtong têa mê chiâng djâ lăm khăm. Ƀok thái pơkeăng tối muăn tro thĕn kŏng chêng rơkong. Kơ’nâi 3 hâi pơlât a hngêi tâng ôh tá kâi prêi, nôu pâ thế djâ muăn lăm khăm a hngêi pơkeăng kân kơpong Tây Nguyên:

“Mot akố têa pơtong gá lo hên tâ troh péa pâ kơpeăng chêng, klêi mê tâ tú iâ troh kơpeăng kŏng nếo. Á xuân ôh tá hlê ‘na pơreăng thĕn kŏng chêng rơkong, xua mê, a hngêi tơmeăm xah hêi dêi vâi ‘nĕng pin ăm ga xah tê xuân ôh tá tơmiât troh rơnó kố tâ tú hên pơreăng’’.

Tiô ƀok thái pơkeăng Huỳnh Thị Bích Như, Khoa Nhi Tổng hợp, Hngêi pơkeăng kân kơpong Tây Nguyên, sap apoăng hơnăm troh nôkố, kơvâ khăm pơlât hiăng tơdah xo pơlât lối 85 ngế hdrêng tro thĕn kŏng chêng rơkong. Ki vâ tối tung pơla 1 khế achê kố kơxô̆ mơngế mot pơlât tâk hên. Nôkố kơvâ ki kố dế pơlât 15 ngế thĕn kŏng chêng rơkong, tung mê ai 2 ngế ki râ. Ƀok thái pơkeăng Huỳnh Thị Bích Như tối:

“Pin hbrâ mơdât ƀă tơdroăng mơdêk ivá mo lĕm ăm kuăn ‘nĕng, ăm kâ ôu tŭm trếo kơhiâm, ôu têa hên vâ tơ’nôm mâu vitamin vâ mơdêk ivá mo lĕm ăm dêi kuăn tơná ƀă pin thế pâk vaccine hbrâ mơdât tơngê ƀă hlối hnê ăm kuăn ‘nĕng kơhnâ xếo kŏng xua pơreăng thĕn kŏng chêng rơkong tâng pin kơhnâ jíu kŏng krúa lĕm xuân kơdroh tâ tú’’.

Bú riân to a Khoa Hồi sức Cấp cứu Nhi ƀă Nhi sơ sinh, Hngêi pơkeăng kân kơpong Tây Nguyên, sap apoăng hơnăm troh nôkố, khoa ki kố hiăng tơdah xo ƀă pơlât ăm 4 ngế vâi hdrêng ki thĕn kŏng chêng rơkong ki râ ƀă râ ó, tâk 100% tâng vâ pơchông ƀă hơnăm hdrối. Ƀok thái pơkeăng chuyên Khoa II Hoàng Anh Tuấn, ngế pơkuâ kơvâ hmâ pơlât ‘na kơvâ Khoa Hồi sức Cấp cứu Nhi  ƀă Nhi sơ sinh, ăm ‘nâi, mâu hơnăm hdrối pơreăng thĕn kŏng chêng rơkong iâ hlo ngế ki chiâng rế râ ó, la hơnăm kố kơxô̆ mơngế ki râ tâk hên, pơreăng mê pro rĕng, pá vâ ‘nâi hdrối mê mâu ƀok thái pơkeăng a Kơvâ pơlât thế khăm ngăn rêm ngăn vâ ‘nâi ivá tơrêm ngế hdrêng vâ teăm pơlât.

“Ƀă ngế ki thĕn kŏng chêng rơkong vâ tối troh nôkố xuân ôh tá chiâng tơngôu. A hnê tối pakĭng tơdroăng hbrâ mơdât môi tiah tơdroăng kâ ôu, mâu tơdroăng thế mơgrúa lĕm, kơhnâ jíu kŏng, tíu ối krúa lĕm đi đo nôu pâ thế tơtrŏng tiah kố, tâng hlo vâi hdrêng lơ tơlêa a rơkong, ôh tá vâ kâ kế, ‘nâ hía hdrêng tơngê hmân ngăn tung châ hlo lo mon pơtong têa thế rĕng djâ vâi hdrêng lăm pơlât a hngêi pơkeăng vâ châ ƀok thái pơkeăng khăm pơlât’’.

Tiô tối tơbleăng dêi Tíu xiâm Séa ngăn mơdât pơreăng kong pơlê Dak Lak, sap apoăng hơnăm troh nôkố, tung kong pơlê ai 158 ngế tâ pơreăng thĕn kŏng chêng rơkong, tung mê ai 1 ngế hlâ. Ki vâ tối, kơxô̆ vâi hdrêng ki tâ tú pơreăng thĕn kŏng chêng rơkong hơ’lêh chiâng râ ó hlo rế tâk hên tâng vâ pơchông ƀă mâu hơnăm hdrối mê hía nah.