VOV4.Xơ Đăng- Pơla hdrối kố nah, mâu kong pơlê tung kơpong Tây Nguyên hiăng thăm mơdêk rĕng tơdroăng mơhnhôk thế pâk vaccine hbrâ mơdât pơreăng COVID-19, tung mê, ki rơhêng vâ tối kal athế pâk i lâp ăm mâu vâi hdrêng ing 5 hơnăm troh pá kơdâm 12 hơnăm, drêng vâi muăn vâ chê mot hơnăm hriâm nếo.

Dak Lak cho kong pơlê ai kơxô̆ mơngế pâk vaccine hbrâ mơdât COVID-19 ăm vâi hdrêng ing 5 troh 17 hơnăm a Dak Lak xuân ối iâ. Tiô pôa Hòang Hải Phúc, Ngế phŏ pơkuâ Tíu xiâm séa ngăn pơreăng kong pơlê Dak Lak, ki xiâm pro kơxô̆ pâk vaccine hbrâmơdât COVID-19 a khu hơnăm ki mê bú iâ cho xua  hâi châ môi tuăn ing mâu nôu pâ. Hên ngế tối tiah kố, vaccine ai hên ki pro chiâng châi tơdroăng ki ê, tơdjâk troh ivá ƀă ki vâ rĕng chôu pâ ƀai hriâm dêi mâu vâi muăn kuăn cháu...

Dak Lak mơdêk rĕng pâk vaccine hbrâ mơdât COVID-19

Pakĭng mê, xua pơreăng COVID-19 hiăng rơhĭng mê hên ngế nôu pâ tơmiât tơngôu pro tơná ôh tá xâu, tá vâ rĕng tơmâng. Vâ mơdêkkơxô̆ mơngế pâk vaccine ăm vâi hdrêng ing 5 troh 17 hơnăm, kơvâ ngăn pơkeăng kô mơdêk tơdroăng cheăng tơrŭm ƀă Khu xiâm ngăn hnê hriâm ƀă hnê mơjiâng tuăn ngôa rơkê kongpơlê vâ hnê tối, mơhnhôk mâu nôu pâ hok tro djâ dêi kuăn lăm troh a tíu pâk, vâ ai tung châ vâi trếo kâi mơdât pơreăng, ví tro tâ tú pơreăng a tung hngêi trung hriâm tung hơnăm hriâm nếo.

“Ƀă vâi hdrêng ing 5 - 12 hơnăm mê thế tơrŭm ƀă kơvâ ngăn hnê hriâm vâ pro ti lâi thái cô, hngêi trung mơhnhôk tối ăm mâu hok tro, nôu pâ hlê mê xuân cho hnoăng ki pơxúa dêi rêm ngế hok tro, rêm ngế nôu pâ vâ pro ti lâi tung pơlê ai trếo kâi mơdât pơreăng. Tâng ôh tá ai trếo ki vâ mơdât pơreăng nếo BA.4, BA.5 kô mot tung Dak Lak la lâi xuân ôh tá ‘nâi. Tâng ôh tá ai trếo kâi mơdât pơreăng tung kuăn pơlê kô tơ’lêi pơreăng COVID-19 vêh tâ tú nếo’’ .

Vâ ‘mâi hnê tối pôi tơngôu, tung tơdroăng hbrâ mơdât pơreăng COVID-19, tung hơnăm nah, kong pơlê Lâm Đồng hiăng mơ-eăm tơbleăng hên troăng rơhlâ, malối mơdêk pâk ăm mâu hok tro  drêng hơnăm hriâm nếo nếo hiăng pơxiâm. Vâ hbrâ mơdât pơreăng COVID-19 châ tơ-brê tơniăn, mơdêk kơxô̆ mơngế lăm pâk, kong pơlê Lâm Đồng dế tơbleăng pâk vaccine COVID-19 tung lâp kong pơlê, tung mê, tơkŭm pâk trum má 3 ăm mâu hok tro ki sap 12 hơnăm troh 18 hơnăm hdrối vâ mot hơnăm hriâm nếo 2022-2023.

Klêi hiăng kum tơ’mot hên ngế hok tro troh mâu tíu pâk tiô tơdroăng tối tơbleăng dêi kơvâ ngăn pơkeăng. O Trần Thanh Vy, hok tro hngêi trung râ má péa Lộc Sơn, pơlê kong kơdrâm Bảo Lộc tối:

“A hiăng xing xoăng chôu vâ troh a tíu hâi, tro chôu. Pakĭng mê, á ối krếo dêi pú lăm pâk, rơtê tơrŭm ivá pêi pro tro mâu tơdroăng ki tơnêi têa tối vâ hbrâ mơdât pơreăng COVID-19”.

Dak Nông tơkŭm po leh “ Mơhnhôk pâk vaccine hbrâ mơdât COVID-19

Vâ mơdêk tơdroăng pâk vaccine, nếo achê kố, Vi ƀan kong pơlê Dak Nông tơkŭm po leh “mơhnhôk pâk vaccine hbrâ mơdât COVID-19’’ hơnăm 2022. Mơhé hiăng ai lối  87% pơ’leăng mâ mơngế kơpêng 18 hơnăm a Dak Nông châ pâk trum má 3 vaccine hbrâ mơdât COVID-19 ối má 6 tung lâp tơnêi têa, la tơdroăng pâk vaccine COVID-19 a hên tíu tung kong pơlê Dak Nông hlo rế vâ iâ, malối pâk trum má 2 ăm vâi hdrêng ing 5 hơnăm troh pá xôp 12 hơnăm, trum má pái ăm vâi hdrêng ing 12 hơnăm troh pa xôp 8 hơnăm.

Hlo tơdroăng mê, Vi ƀan kong pơlê Dak Nông pơkâ thế mâu kơ koan tíu pêi cheăng tung lâp kong pơlê mơdêk hnoăng cheăng pêi, tơkŭm ivá mơdêk pâk tŭm trum ăm vâi hdrêng ing 5 hơnăm troh 12 hơnăm; mơ-eăm pê klêi rĕng má môi pâk trum má 4 ăm kuăn pơlê ing 18 hơnăm tơngi klêng ƀă mơdêk rĕng pâk trum má 3 ăm mâu ngế ing 12 troh 18 hơnăm tiô hnê mơhno dêi Khu xiâm ngăn pơkeăng pơlât.

Pôa Nguyễn Văn Toàn, Ngế pơkuâ ngăn hnê hriâm ƀă hnê mơjiâng tuăn ngôa rơkê Dak Nông ăm ‘nâi, tơdroăng tơkŭm po Leh “Mơhnhôk pâk vaccine hbrâ mơdât pơreăng” a rôh hơnăm hriâm nếo pơxiâm ai pơxúa khât ƀă mâu hok tro rêm râ ƀă mâu ngế châ tơmâng khât.

“Vâ hbrâ mot hơnăm hriâm nếo la ngiâ mê khu ngăn pơkeăng hiăng tơrŭm ƀă Khu ngăn hnê hriâm chêh pơkâ, ing nôkố ta troh hdrối hâi leh mot hơnăm hriâm nếothế mơdêk pâk vaccine ăm mâu vâi muăn ki tro hơnăm. Tung mê, tơrŭm ƀă dêi rơpó vâ pêi mâu troăng rơhlâ hbrâ mơdât hên túa pơreăng malối cho tơngê lo mơheăm. Tơdroăng mê nôkố hiăng châ hnê mơhno ing Vi ƀan ta troh 2 tíu ƀă mâu kơvâ cheăng ai tơdjâk troh malối cho Vi ƀan hnê ngăn tơring pơlê kong kơdrâm vâ pêi tơdroăng mê, ƀă riân ngăn mâu pơkâ. Mâu bêng, cheăm, pơlê kân, ki ai xô̆ la vaccine pâk iâ malối thế tơmâng vâ châ pêi tro tiô pơkâ ki Chin phuh pơkâ’’.

Môi tiah mê, kơ koan khu râ pơkuâ cheăng kong pơlê Gia Lai xuân dế tơbleăng hên troăng rơhlâ pơtối mơdêk kơxô̆ ki pâk vaccine COVID- 19 ăm vâi hdrêng ing 5troh pa xôp 12 hơnăm. Pôa Đinh Hà Nam, kăn phŏ pơkuâ ngăn pơkeăng Gia Lai ăm ‘nâi, vâ pơtối mơdêk kơxô̆ vaccie COVID-19 ăm khu hơnăm ki mê, kong pơlê Gia Lai hiăng mơ-eăm tơbleăng hên troăng: mê cho tơrŭm ƀă kơvâ tối ăm ‘nâi mâu tơdroăng hlá tơbeăng hyôh rơ’jíu, kơvâ ngăn hnê hriâm, mơhnhôk mâu nôu pâ hok tro; mơdêk séa ngăn, tí tăng ngăn, tơbleăng pâk ing  cheăm bêng.

Pôa Nam ăm ‘nâi, nôkố, rêm hâi kong pơlê Gia Lai xuân ai chât ngế tâ COVID-19. Xua mê, kơvâ ngăn pơkeăng hnê tối ăm mâu nôu pâ, thế ăm dêi kuăn pâk tŭm vâ tơniănai ivá kâi mơdât pơreăng, malối cho apoăng hơnăm hriâm nếo:

“Troh a rơpŏng hngêi, krếo phôn ăm nôu pâ chơ dêi mâu kuăn cháu lăm troh a tíu pâk. Tung la ngiâ, tơdroăng hbrâ hnê tối xuân cho kơxô̆ 1. Ki kal má môi cho khu hnê mơhno dêi kong pơlê, râ cheăm, bêng pơlê kân rơtế ƀă mâu hngêi trung krếo thế mâu ki tro hơnăm lăm pâk. Kơvâ ngăn pơkeăng ngin la lâi xuân po tíu pâk a mâu hngêi pơkeăng cheăm, la lâi xuân po, hbrâ vâ lăm pâk ukố umê troh a thôn pơlê. Púi vâ ki kân má môi dêi ngin cho nôu pâ thế ăm dêi kuăn lăm pâk vâ tơniăn ăm tơná vâi ƀă mâu ngế tung pơlê”.

Ƀăng hên tơdroăng pêi pro pơrá phá dêi rơpó, mâu kăn ƀă kơvâ cheăng hiăng a mâu kong pơlê tung kơpong Tây Nguyên hiăng ƀă dế mơdêk rĕng tơdroăng pâk vaccine COVID-19 ăm mâu ki sap ối kŭn troh mâu hiăng kân, drêng hơnăm hriâm nếo hiăng troh.

VOV Tây Nguyên

Gương tơplôu ƀă tơbleăng