VOV4.Xơ Đăng - Mơhé lâp tơnêi têa hiăng pâk châ lối 255 rơtuh kong kếo vaccine COVID-19 ăm kuăn pơlê, laga tơdroăng pâk trum má 3, trum má 4 a mơngế sap ing 18 hơnăm tơngi klêng, ki rơhêng vâ tối kơxô̆ ngế pâk 2 trum vaccine ăm vâi hdrêng 5 troh pá kơdâm 12 hơnăm bu iâ, kơxô̆ vaccine mâu kong pơlê kĭ sap ing kố troh mơ’nui hơnăm iâ tâ tâng pơchông ƀă kơxô̆ kal vâ pâk.

Tơdroăng kố pơkâ mâu tơdroăng kal tah lôi vâ thăm rĕng pâk vaccine tung la ngiâ. Kố xuân cho tơdroăng xiâm roh hôp mơ’no tơdrêng tung um tiô troăng hyôh măng hbrâ mơdât pơreăng dêi Khu xiâm pơkuâ ngăn pơkeăng ƀă khăm pơlât 63 kong pơlê, pơlê kong kơdrâm tơkŭm po kơxo lơ 25/8.

Vâ thăm pâk vaccine, phŏ yăo sư, tiê̆n sih Nguyễn Thị Liên Hương, Ngế xiâm phŏ pơkuâ ngăn pơkeăng ƀă khăm pơlât tối ăm ‘nâi, Khu xiâm dế pơkâ Khu pơkuâ ngăn pơkeăng ƀă khăm pơlât mâu kong pơlê tơrŭm ƀă Khu pơkuâ hnê hriâm ƀă Hnê mơjiâng thăm pêi pro rĕng tơdroăng tơkŭm po pâk ăm vâi hdrêng 5 troh pá kơdâm 12 hơnăm tung khế 8 – 9/2022 ƀă vêh pâk ăm mơngế 12 troh pá kơdâm 18 hơnăm, kêi đeăng tung hneăng má III/2022 klêi kơ’nâi vâi hdrêng vêh hriâm a hngêi trung. Tơkŭm po vêh pâk ăm mơngế sap ing 18 hơnăm tơngi klêng, mơdêk tơdroăng ki pâk trum má 3 châ lối 90%.

A Sa Ly tơplôu ƀă tơbleăng