Dế pơlât êi đại tràng xua pơreăng ki pro vâ chiâng nŭm nheăn a Khoa Nội dêi Hngêi pơkeăng tơring Krông Ƀuk, nâ H’Pốc M’Jao, ƀuôn Adrơng Prong, cheăm Čư̆ Pơng, ăm ‘nâi, kố cho rôh má 2 tung hơnăm kố nâ thế koi pơlât a hngêi pơkeăng. Tŭm 2 hdroh nâ pơlât xuân tâ hmiân tuăn drêng châ mâu ngế cheăng ngăn ‘na pơkeăng, ƀok thái pơkeăng akố pơlât ngăn krâu khât:

“Ƀok thái pơkeăng tơmâng pơlât ngăn krâu khât mâu ki châi tamo. Pơlât akố ôh tá tô tuăn hên. Nôkố a tâ hiăng chía tâ hên iâ’’.

Pakĭng xoăng pơlât dêi nâ H’Pốc, ngoh Y Thế Niê, ƀuôn Ea Brơ, cheăm Cư̆ Pơng, tơring Krông Ƀuk, dế koi pơlât a xoăng ki mê xua êi xôu ki râ. Ngoh tro êi xôu mê hiăng vâ chê 1 khế, rôh apoăng mot pơlât a pơlê kong krâm Ƀuôn Hồ, klêi mê pâ pơtroh pơlât a hngêi pơkeăng tơring Krông Ƀuk. Kơ’nâi 4 hâi pơlât, tơdroăng châi tung châ ngoh tâ hiăng chía tâ:

“A kố krúa lĕm, ƀok thái pơkeăng pơlât ngăn krâu khât, ăm pơkeăng tŭm tâ pơlât a hngêi pơkeăng Ƀuôn Hồ. Nôkố tâ dêi ivá hiăng mo lĕm, mơni xo ah hiăng châ lo ing hngêi pơkeăng”.

Tiô ƀok thái pơkeăng Y Păm Ayun, ngế pơkuâ Khoa Nội, hngêi pơkeăng tơring Krông Ƀuk, 2 khế achê kố, drêng Hngêi pơkeăng hiăng pro klêi tơdroăng rôe ‘mot pơkeăng, kơxô̆ mơngế troh khăm pơlât tung khoa ki kố hiăng tâk hên, ai hâi ki ‘nâ bê hâ ho mơngế troh pơlât:

“Sap khế 4 troh khé 7 xua ôh tá bê pơkeăng pơlât mơngế ki troh lăm pơlât ôh tá ai pơkeăng vâ pơlât mê vâi hiăng lăm pơlât a tíu ê. La sap khế 9 troh khế 10 pơkeăng hiăng troh hên kuăn pơlê hiăng troh pơlât akố. Tâng vâ pơchông ƀă tơdroăng pơkâ apoăng hơnăm ƀă hnoăng cheăng pêi dêi Khu xiâm ngăn pơkeăng pơcháu, pơla hdrối kố nah ai mâu hâi ki ‘nâ hlo tâk hên. Hmâ hlo vâi ăm pin 25 to xoăng koi pơlât tê, la  ai hâi ki ‘nâ a kố xo khăm pơlât ăm koi 27 troh 28 to xoăng koi pơlât’’.

A kơpong peăng kơnhŏng kong pơlê Dak Lak, tâng riân rêm hơnăm, Hngêi pơkeăng tơring Krông Ƀuk tơdah xo pơlât dâng 5 rơpâu 700 ngế châi tamo. Rôh ai pơreăng COVID-19 tâ tú, Hngêi pơkeăng châ  xúa vâ pơlât ăm lối 3.500 ngế châi tamo COVID-19  a mâu tơring Krông Ƀuk, Ƀuôn Hồ, Krông Năng ƀă Ea H’leo. Klêi pơreăng tâ tú, xuân môi tiah hên tíu pêi cheăng ki ê a tơring, Hngêi pơkeăng pêi cheăng pá puât xua ôh tá bê tŭm pơkeăng ƀă tơmeăm xúa tung khăm pơlât.

La ƀă mâu tơdroăng mơ-eăm ôh tá la lâi pơtê, khế 9 kố nah, Krông Ƀuk hiăng pê klêi mâu tơdroăng pro hlá mơ-éa rôe pơkeăng, cho môi tung kơxô̆ ki iâ hngêi pơkeăng a Dak Lak kâi tah ki xơpá tơdroăng ôh tá ai tŭm pơkeăng ƀă tơmeăm xúa tung khăm pơlât. Pôa Trần Thuận, Ngế pơkuâ hngêi pơkeăng tơring Krông Ƀuk ăm ‘nâi:

“Hngêi pơkeăng xuân pơkâ môi tơdroăng, má môi cho ‘mâi hơ’lêh nếo mâu ngế cheăng ngăn pơkeăng, má péa nếo pro ti lâi vâ thế ai tŭm pơkeăng tơmeăm xúa tung khăm pơlât kuăn pơlê, má pái nếo rơtế amê pin ai tôh lăm pêi cheăng khăm pơlât tung kuăn pơlê  pêi cheăng a mâu cheăm, thôn, ing mê pin hlối tơbleăng tối ăm kuăn pơlê hngêi pơkeăng pin ngăn pơkeăng hiăng ai tŭm pơkeăng pơlât ivá kuăn pơlê mê ah kuăn pơlê ‘nâi vâi kô troh lăm khăm pơlât hên tâ’’.

Ƀă tơdroăng mơ-eăm tơkâ luâ xơpá dêi khu pú hên kăn ƀô̆ ngăn pơkeăng cheăng ‘na khăm pơlât, ƀok thái pơkeăng, mâu hơnăm achê kố, ki tơƀrê tơdroăng cheăng khăm pơlât dêi Hngêi pơkeăng tơring Krông Ƀuk rế ton rế hlo tơƀrê, kơxô̆ mơngế pơlât pơtroh pơlât a râ kơpêng hiăng kơdroh, mơngế troh pơlât a hngêi pơkeăng rế krâm. Hngêi pơkeăng tơxâng cho tíu khăm pơlât krá kak tung khăm pơlât ivá kuăn pơlê tung tơring.