Cho tung tơdroăng po leh Măng tĭng mơhno Túa lĕm tro - Ôm hyô kong pơlê Kon Tum rôh má 5 hơnăm 2024, leh tơbâ 56 hơnăm Hâi tơplâ ta troh hlâ dêi mâu ngế tơplâ khên tơnôu hiăng hlâ Tíu ki a ‘ngêi  995 - Chư Tan Kra (hâi lơ 26/3), Vi ƀăn kuăn pơlê dêi tơring Sa Thầy tơrŭm ƀă Khu xiâm ngăn Túa lĕm tro, Tơ’noăng ivá ƀă Ôm hyô  kong pơlê Kon Tum tơkŭm po Tơ’noăng to pa rơsut po rơdâ “Vâ ngăn kong ngo” - Sa Thầy hơnăm 2024”.

Po tơ’noăng mê tung pơla 3 hâi, sap kơxo hâi lơ 22/3 troh tâi hâi lơ 24/3, ai lối 120 ngế ki veăng to, tung mê ai 45 ngế cho mâu ngế kong têa ê dế veăng hriâm tâp ƀă hmâ tơkŭm rêm hâi a mâu Kâu Lak ƀô̆ To pa rơsut tung tơnêi têa. Ing mâu tơdroăng cheăng kố, Khu tơkŭm po púi vâ pơtối rak vế ƀă mơnhông tơƀrê tơdroăng to pa rơsut a kong pơlê; tơkŭm ƀă tơdroăng ôm hyô ngăn ki rơ-iô, túa lĕm tro, tăng ‘nâi tơdroăng ton tĭn rôh nah, chiâng tơdroăng xah hêi tơ’mot hên tơmôi troh ôm hyô.