Veăng Hneăng tơ’noăng Phù Đổng hơnăm kố, ai vâ chê 1.500 ngế tơ’noăng dêi mâu hngêi trung a 11 kong pơlê, pơlê kong kơdrâm mê cho: Pơlê kong kân Hồ Chí Minh, Bà Rịa – Vũng Tàu, Đồng Nai, Tây Ninh, Ninh Thuận, Bình Thuận, Bình Dương, Bình Phước, Lâm Đồng, Gia Lai, Kon Tum, Dak Nông ƀă khu ki tơkŭm po Dak Lak veăng tơ’noăng.

Mâu ngế tơ’noăng mê tơ’noăng a 11 môn, mê cho: Kơtú ƀa long, peăng ƀa long, trut loăng, tơhrot kơxái, aerobic, ƀa long baskit, peăng xâk í, tah xâk í, klê têa, kơtâu ƀă peăng pĭng pŏng. Hneăng tơ’noăng Phù Đổng châ tơkŭm po rêm hneăng 5 hơnăm môi xôh, vâ rak ƀă mơdêk Roh mơhnhôk “Tâi tâng kuăn pơlê pơtâp ivá tiô troăng tơdjâ Pôa Hồ”, mơhnhôk hok tro phôh thong đi đo pơtâp ivá ƀă tơ’noăng mâu môn tơ’noăng tung hngêi trung, mơdêk ivá, mơnhông châ chăn, kum hnê hriâm tâi tâng ăm hok tro; châ hlo mâu ngế ki rơkê ‘na ivá vâ hnê tơ’nôm, hnê mơjiâng ăm tơ’noăng ivá tơnêi têa.