Mơđah tơbleăng um ki ƀlêi chiâng Dak Nông luâ 20 hơnăm
Thứ bảy, 06:00, 23/03/2024
Tơplôu: Katarina Nga/VOV Tây Nguyên
Tơplôu: Katarina Nga/VOV Tây Nguyên
VOV4.Xơ Đăng - Drêng tơbâ 20 hơnăm hâi vêh mơjiâng, kơxo lơ 23/3, Vi ƀan hnê ngăn kong pơlê Dak Nông tơrŭm ƀă Tíu xiâm ‘Măn rak kế tơmeăm Tơnêi têa II tơkŭm pơxiâm po mơđah tơbleăng “Tơdroăng mơjiâng, mâu tơdroăng ƀlêi chiâng ‘na kal kí, cheăng kâ, túa lĕm tro, pơlê pơla, gâk kring, cheăng lêng dêi kong pơlê Dak Nông tung 20 hơnăm”.
Mơđah tơbleăng vâ chê 270 kơtâ um, kế tơmeăm, lơgât, ki pro ƀă loăng vêh mơhno túa lĕm tro, tơdroăng ton nah, tơdroăng ƀlêi chiâng cheăng kâ – rêh ối pơlê pơla, gâk kring, cheăng lêng dêi Dak Nông nah ƀă nôkố. Tung mê, ai mâu hlá mơéa ki ‘măn rak hiăng pơxiâm ai mâ kơtăn kố vâ chê 20 hơnăm. Mâu hlá mơ-éa, lơgât mơhno tơdroăng ki hơ’lêh tơkŭm chêh pro hlá mơ-éa, inâi tơnêi, inâi pơlê a kong pơlê Dak Nông ing mâu rôh hdrối mê hiá nah.
Mơđah tơbleăng cho tơdroăng ki vâ tơbleăng tơdroăng ton nah ai xiâm rêi kơnía git ăm hnoăng cheăng hriăn ngăn túa lĕm tro, tơdroăng ton nah dêi mâu khu ki hriăn ‘na khoa hok; pro chiâng tơdroăng ki hriâm tâp, tăng ‘nâi ‘na khôi hmâ ăm kuăn pơlê a kong pơlê.
Viết bình luận