Kố cho pơkâ dêi Khu kăn séa ngăn Hô̆i đong hnê ngăn kuăn pơlê kong pơlê Dak Lak tung rôh pêi cheăng ƀă Vi ƀan hnê ngăn kong pơlê ‘na tơdroăng pêi pro tiô Pơkâ dêi Hô̆i đong hnê ngăn kuăn pơlê kong pơlê  ‘na “Mơnhông pêt kơphế krá tơniăn dêi kong pơlê troh hơnăm 2020 ƀă troăng rơhlâ troh hơnăm 2030” (pơxá tơdroăng Pơkâ 24).

Kơ’nâi 7 hơnăm pêi pro tiô pơkâ 24 (2027-2023), hên tơdroăng hiăng tiô pơkâ: tơmeăm pê lo châ 510 rơpâu tâ̆n tung môi hơnăm, riân rêm ngê pêi vâ chê 27 tă tung môi ha, tâk 14% tâng vâ pơchông ƀă Pơkâ tâi tâng tơnêi pêt kơphế ai hlá mơ-éa mơnhên châ lối 30 rơpâu 300 ha, tâi tâng tơmeăm pê lo châ 100 rơpâu tâ̆n, ai dâng 90% kơxô̆ kơphế châ krí, têng ƀă ‘măn rak tro tiô pơkâ kih thuât.

A rôh pêi cheăng, mâu kăn tối tiah kố, tơdroăng tơbleăng pêi Pơkâ 24 xuân ối hên ki tơvâ tơvân, ôh tá tro, malối cho tăng liăn mung vâ ‘mâi pêt kơphế, hâi ai luât pơkâ tơtro pơla mâu khu mơdró ki pêt kơphế ƀă kong pơlê. Tơdrêng amê, tơdroăng tơbleăng pêi mâu tơdroăng pơkâ 24 troh mâu khu mơdró hâi teăm tơdrêng, mâu tơring cheăm ki ‘nâ hâi tơmâng tơbleăng pêi tơdroăng cheăng tơrŭm ôh tá rơhéa, deăng pêt kơphế ki châ mơnhên tối ối iâ...

Khu kăn séa ngăn pơkâ thế, mâu kơvâ cheăng ƀă cheăm tơring tung kong pơlê ki tơdjâk troh thê ai hnoăng cheăng pêi kơhnâ khât tâ nếo tung tơbleăng pêi Pơkâ 24 dêi Hô̆i đông hnê ngăn kuăn pơlê kong pơlê. Tung mê, Vi ƀan hnê ngăn kuăn pơlê kong pơlê thế rĕng tơkŭm tối mơgêi tơdroăng pêi pro tiô Pơkâ mê.