Kơxo hâi lơ 11/1, Khu ngăn ‘na chiâk deăng ƀă mơnhông thôn pơlê kong pơlê Dak Lak tơkŭm po hôp tơpui “Troăng rơhlâ pro tơniăn báu krúa kơdroh ai trếo ‘mêi ƀă mơdêk pê lo’’ vâ tơpui ‘na túa pêi cheăng, tăng mâu troăng rơhlâ ki tơtro vâ mơdêk kơvâ pêi chiâk dêi kong pơlê mơnhông krá tơniăn kế kâ, rơtế ƀă rak vế hyôh  kong prâi nhâ loăng, têa.

Mơdâ pêt báu dêi Dak Lak nôkố ối má môi kơpong Duyên Hải  Nam Trung ƀộ ƀă Tây Nguyên ƀă tơnêi mơdâ pêt lối 100 rơpâu ha, châ vâ chê 35% deăng pêt loăng plâi rêm hơnăm dêi kong pơlê; châ xo lối 69 tă/ha, hơnăm 2023 riân báu châ xo dâng 800 rơpâu tâ̆n. Dak Lak hiăng ai kơpong mơdâ pêt báu vâ tê, ai tiô mơngế vâ rôe  tung tơnêi têa xuân môi tiah tê ăm kong têa ê.

La a rôh tơpui tơno, mâu kăn hiăng hlo; báu phái nôkố dế trâm xơpá, pơloăng mơnúa xua hyôh kong prâi hơ’lêh. Vâ mơdâ pêt báu krá ton lĕm, kơdroh xoh hên pơkeăng, kơdroh mơ’no hyôh ‘mêi ing hngêi nhĕng, kal tơmâng mơdâ pêt hdrê báu ki tơtro, xúa phon, pơkeăng ki tơtro, pơ’lêh tung mơdâ pêt, tơmâng khât tâ nếo tro kih thuât pêt rak ngăn báu nếo.