Dế ối ‘nân rơnêu dêi ƀai chêh vâ tơbleăng a trang Chonongsandaklak.vn, ngoh Y Pốt Niê, Kăn pơkuâ Kŏng ti pêi cheăng tiô rơnó Êđê cà phê ăm ‘nâi, trang thương mại điê̆n tưh kố châ bro lĕm mơnâ mâ, pơxúa, tơ’lêi ăm ngế ki tê ƀă ngế ki roê xua ai mâu tơdroăng ki vâi ‘nâi plĕng nhên dêi tơrêm to kế tơmeăm.

“Apoăng pro pơxúa tơ’lêi ăm ngế ki roê, ƀă má péa cho khu mơdró kâ môi tiah ngin mê kô mơdêk kế tơmeăm mot tung mê gá tơ’lêi hlâu khât, túa ki á pơkâ vâ á ăm mâu kế tơmeăm mot tung mê gá tơ’lêi hlâu, tá ngế ki ôh ti ‘nâi ‘na kong ngê̆ thong tin mê vâi xuân chiâng vâ xúa smartphone lơ laptop vâ pro, mê tơná á hâk tơkôm ƀă tơngah tiah kố chonongsandaklak.vn rế hía rế mơnhông tâ ƀă châ hên ngế ‘nâi troh tâ, ôh ti xê to a Dak Lak mê tá tơnêi têa Việt Nam, tá kong têa ê pơrá ‘nâi troh kơchơ tê tơmeăm pêi lo ing chiâk deăng kố”.

Tiô nâ Lê Thị Nga, pơkuâ ngăn dêi Kŏng ti cà phê Vương Thành Công, pakĭng ki pơxúa bro tíu vâ ngế ki roê ƀă ngế ki tê tơdrêng tơpui tơno, ôh tá mâ, ai ngế ki ối a dế, Kơchơ tê tơmeăm pêi lo ing chiâk deăng Dak Lak online ối cho tíu vâ mâu khu mơdró kâ mot tăng, xiâm rêi pêt mơjiâng pro, inâi dêi kế tơmeăm tiô túa ki rĕng, tro.

“Ngin tơngah khât a rôh po kơchơ kố ƀă ngin rơhêng vâ tiah kố rôh po kơchơ kố lôu péa kô pro pơxúa ăm tơdroăng tơƀrê nếo ăm kế tơmeăm pêi lo ing chiâk deăng Việt Nam tối tơdjuôm ƀă Dak Lak tối krê”.

Tiô jâ Lại Thị Loan, Kăn hnê ngăn kuăn pơlê pêi chiâk deăng kong pơlê Dak Lak, tơdroăng ki veăng tung Kơchơ tê kế tơmeăm pêi lo ing chiâk deăng Dak Lak online kô mơdêk mâu khu pêi cheăng tơrŭm, chi hô̆i, tôh, hô̆i cheăng pêi, kuăn pơlê pêi chiâk hbrâ rơnáu mơdêk ki kơnía dêi kế tơmeăm, pêt mâu kế tơmeăm tung chiâk deăng tơniăn, tro tiô pơkâ ƀă chêh inâi. Tơdrêng amê hlối kum kuăn pơlê pêi chiâk ‘nâi nhên tơdroăng ki rơhêng vâ dêi kơchơ tê mơdró, ing mê, klâ xoăng pêt ƀă ai troăng tơmiât rơnêu kế tơmeăm tơtro ƀă kơchơ mơdró; veăng kum mơđah tơbleăng ki ai hlâu, ki pơxúa, tơnêi pêi chiâk deăng kong pơlê, ing mê krếo thế pơkâ mơdêk ‘no liăn cheăng, pêt tiô tơdroăng ki kơnía dêi kế tơmeăm pêi lo ing chiâk deăng.

“Ngin ai mơjiâng Khu pơkuâ ngăn Kơchơ kô séa ngăn đi đo vâ mâu kế tơmeăm kố pêi pro châ tơdroăng ki rơhêng vâ tiô tro môi tiah tơdroăng ki chêh inâi, xuân môi tiah tŏng kum ăm ngế ki tê tung tơdroăng ki tê mơdró vâ rak tơniăn tiô pơkâ ƀă rak tơniăn hnoăng pơxúa ăm ngế ki tê ƀă ngế ki roê. Ki má mơ’nui mê cho mơdêk pêi lo liăn, mơdêk tơdroăng rêh ối dêi kuăn pơlê pêi chiâk veăng kum mơdêk pêi chiâk deăng dêi kong pơlê cho pêi chiâk deăng ngiât, pêi chiâk deăng hưh cơ ƀă mơnhông krá tơniăn xuân môi tiah xúa kong ngê̆ kơxô̆ tung pêt, tung tê tơmeăm vâ rêm ngế kuăn pơlê pêi chiâk rế cho môi ngế mơdró a ƀăng tơnêi dêi tơná”.

Pôa Nguyễn Thiên Văn, Kăn phŏ hnê ngăn Vi ƀan kong pơlê Dak Lak ăm ‘nâi, a kong pơlê ai 152 kế tơmeăm pêi lo ing chiâk deăng châ mơnhên tối pơxá sap ing 3 hơlŏng tơngi klêng, xua mê tơdroăng ki mơđah tơbleăng tơdjêp pơla ngế ki pêt ƀă ngế ki roê ing troăng tê điê̆n tưh cho kal khât. Pôa Nguyễn Thiên Văn tối nhên, tung la ngiâ, mâu tơdroăng cheăng tê mơdró a điê̆n tưh kô rế hía rế túa tơtro tâ ƀă tơxup tơbriât tâ. Khu ngăn kuăn pơlê pêi chiâk kal tŏng kum khu pêi cheăng tơrŭm, rơpŏng tê mơdró, vâi krâ nhŏng o ki pêi chiâk deăng hbrâ nhên, tơdâng tơ’mô sap ing pêt, lâk xo, ‘măn rak, tơdâng tơ’mô ki lĕm, chêh bro klêi túa ki tí tăng xiâm kối mâu kế tơmeăm.

“Pơkâ thế Khu ngăn kuăn pơlê pêi chiâk dêi kong pơlê pơtối hnê tối troh lâp lu ‘na trang thong tin điê̆n tưh xuân môi tiah tối mâu tơdroăng pơkâ ki ai tơdjâk troh tơdroăng ki ăm mâu kế tơmeăm ối a tíu tê dêi tơná. Má péa tung pơla tơbleăng pêi pro ki dâi lĕm dêi kế tơmeăm, tơdroăng pơkâ yă tê tơxup tơbriât, tơdroăng ki mơdêk ki kơnía dêi kế tơmeăm mê xuân pơkâ thế Khu ngăn kuăn pơlê pêi chiâk pơtối hnê mơhno nhên tâ nếo vâ mâu hô̆i viên ôh tá la lâi pơtê mơdêk ki dâi lĕm dêi kế tơmeăm ‘na túa, tíu tăng xiâm kối xuân môi tiah inâi”.

Ngế chêh hlá tơbeăng ki chêh ‘na tơdroăng kố hiăng ai rôh tơpui tơno ƀă jâ Lại Thị Loan, Kăn hnê ngăn Kuăn pơlê pêi chiâk kong pơlê Dak Lak – tíu pêi cheăng pơkuâ dêi Chonongsandaklak.vn ‘na mâu tơdroăng pơkâ veăng tung Kơchơ tê tơmeăm pêi lo ing chiâk deăng online xuân môi tiah hnoăng cheăng dêi Khu tung tơdroăng pơkuâ trang thương măi điê̆n tưh kố, pó vâi krâ nhŏng o kô tơmâng.

-Pâ jâ ăm ‘nâi, drêng veăng tung chonongsandaklak.vn ngế ki tê kal rak tơniăn mâu tơdroăng pơkâ ki lâi?

-Jâ Lại Thị Loan: Drêng veăng tung trang thương măi điê̆n tưh kơchơ tê tơmeăm pêi lo ing chiâk deăng Dak Lak.vn mê ƀă mâu hô̆i viên ki pêi chiâk deăng mâu khu pêi cheăng tơrŭm, khu mơdró kâ chi hô̆i pêi cheăng ƀă tôh pêi cheăng cho ngế ki tê athế rak tơniăn má môi mê cho kế tơmeăm dâi lĕm, mâu kế tơmeăm ki ‘mot tung tíu tê athế rak tơniăn pơkâ mâu tơdroăng ki vâi thế tiô pơkâ tơdjuôm ƀă tơdrêng amê kô athế pêi pro tiô mâu pơkâ dêi luât xuân môi tiah pơkâ dêi Kơchơ ‘na túa ki tê xuân môi tiah roê tê; má pái nếo cho drêng veăng tung kơchơ mê ngế ki tê kô ai troăng vâ pro tiah lâi klêi mê mơnhông tơmeăm dêi tơná tro tâ vâ pêi pro châ tiô tơdroăng ki rơhêng vâ roê xúa dêi kơchơ mơdró. Ƀă ngế ki roê mê drêng veăng pêi pro mâu tơdroăng roê xuân athế rak tơniăn tơdroăng ki tơbleăng tơdrăng ƀă tơdroăng ki tơniăn xuân môi tiah rak vế mâu tơdroăng ki tơrŭm ƀă ngế ki tê kô châ pêi pro kơtăng.

-Tiah mê veăng tung Kơchơ tê tơmeăm pêi lo ing chiâk deăng online kố vâi kô châ mâu tơdroăng pơxúa ki lâi ô jâ?

-Jâ Lại Thị Loan: Tơdroăng ki châ má môi cho ƀă ngế ki ê, ôh ti xê to châ tê mâu tơmeăm mê ki kal tâ pin tơbleăng tơdroăng ‘na tơmeăm dêi tơná troh ƀă tâi tâng rêm ngế; tơdroăng ki ê nếo mê cho drêng veăng tung tíu mơdró pakĭng châ tơbleăng ‘na kế tơmeăm mê ngế ki tê mê ối châ ‘nâi mâu tơdroăng ‘na kơchơ tê mơdró tung kong pơlê tung tơnêi têa xuân môi tiah tơdroăng ki vâ  ‘nâi ‘na rơnó vâ pin ‘nâi nhên nôkố kơchơ mơdró kal vâ klâi môi tiah lâi rơnó gá tiah lâi vâ ‘mâi rơnêu pêt; má pái cho ai tíu vâ tơrŭm pêt ƀă khu mơdró kâ vâ mơjiâng ki kơnía dêi kế tơmeăm pêi lo ing chiâk deăng ƀă malối cho khu mơdró kâ kô châ pơxúa hên me cho tơdroăng ki tơbleăng tơdrăng dêi kế tơmeăm, akố gá ai hên mâu kế tơmeăm chiâng vâ pơchông ‘na ki dâi lĕm ‘na yă tê ƀă xiâm kối pêt mơjiâng ƀă hmian tuăn ‘na ki dâi lĕm dêi kế tơmeăm.

-Bă hnoăng cheăng cho Kơ koan pơkuâ dêi trang thương măi điê̆n tưh kố, Khu ngăn kuăn pơlê pêi chiâk kong pơlê kô pơkuâ ngăn, ƀă tŏng kum mâu ngế ki pơkuâ kơbong tê tơmeăm a trang kố môi tiah lâi vâ rế rak tơniăn ki dâi lĕm dêi kế tơmeăm xuân môi tiah mâu tơdroăng dêi luât pơkâ, ô jâ?

-Jâ Lại Thị Loan: Khu ngăn kuăn pơlê pêi chiâk kong pơlê mơjiâng Khu pơkuâ ngăn kơchơ ƀă hiăng ai túa pơkâ pêi nhên ƀă mâu hnoăng cheăng dêi Khu pơkuâ ngăn ƀă ngế ki pơkuâ Khu pơkuâ ngăn xuân môi tiah mâu ngế ki cheăng tung Khu kô ai hnoăng cheăng pêi nhên tung tơdroăng pơkuâ ngăn mâu tơdroăng kal pơkuâ ngăn mâu tơdroăng ki tê mơdró tung trang thương măi điê̆n tưh vâ rế rak tơniăn ăm ngế tê ƀă ngế ki roê hbrâ rơnáu xêh la tung tơdroăng pơkuâ ngăn nhên mâu tơdroăng kal mâu kế tơmeăm tâng ai mâu tơdroăng xôi ki lâi ‘lo kô pơxâu phak tiô pơkâ ƀă ôh ti ai tơdroăng ki tŏng kum mâu ngế ki pro xôi mê châ pêi pro tiô pơkâ. Túa tơmiât kố cho ki kal vâ Khu ngăn kuăn pơlê pêi chiâk kong pơlê mơ-eăm hên tơdroăng vâ mơjiâng xua ki pơxúa ôh ti xê ki tơkâ mê cho vâ mơđah tơbleăng inâi kế tơmeăm dêi kong pơlê mơjiâng inâi kế tơmeăm dêi kong pơlê ing mê tối nhên inâi kế tơmeăm pêi lo ing chiâk deăng dêi Việt Nam.

-‘Na ki ton xŏn, Khu kô ai mâu túa pơkâ ƀă po rơdâ trang thương măi điê̆n tưh kố môi tiah lâi, ô jâ?

-Jâ Lại Thị Loan: Ƀă mâu tơdroăng ki tê mơdró điê̆n tưh ki lâi lơ môi tơdroăng ki xúa ‘na kơmăi kơmok kơxô̆ mê rế hía rế athế hơ’lêh nếo vâ tơtro tơdjuôm ƀă tơdroăng ki mơnhông dêi pơlê pơla mê Trang thương măi điê̆n tưh Chonongsandaklak.vn xuân môi tiah mê, kô athế ai tơdroăng ki hơ’lêh, tơdroăng ki mơdêk. Tâng môi tiah 500 kơbong mơđah tơbleăng tê tơmeăm ôh tá châ tiô tơdroăng ki rơhêng vâ mê kô po rơdâ tơ’nôm ngin kô klâ xoăng túa pơkâ tiô rêm hneăng ƀă ai túa pơkâ rơnêu xuân môi tiah po rơdâ tơ’nôm mâu kơbong tê tơmeăm tâng tơdroăng ki rơhêng vâ dêi ngế ki veăng po rơdâ ƀă đi đo hơ’lêh ƀă hnoăng cheăng pơkuâ ngăn mê xuân kô krá tơniăn tâ nếo vâ tíu tê mơdró điê̆n tưh pêi cheăng tơƀrê tâ kal tâ ôh ti xê tê châ to to kế tơmeăm tung môi hâi mê cho mơđah tơbleăng kế tơmeăm pêi lo ing chiâk deăng dêi kong pơlê xuân môi tiah dêi Việt Nam ƀă mâu kế tơmeăm OCOP dêi 63 to kong pơlê.

-Ê, mơnê kơ jâ ‘na mâu tơdroăng ki tiâ mơnhên ai pơxúa mê!