Pôa Lê Trung Kiên, ngê pơkuâ ngăn Hno rơchoâ long têa kong pơlê Dak Nông ăm ‘nâi, tiô tối tơbleăng hdrối dêi kơ koan pơtâng tối ‘na hyôh kong prâi, ing khế 2 troh khế 4/2024, têa a mâu kơpong tung kong pơlê kô xiâ mê chiâng pro khăng khoăng, ôh ti ai têa vâ tôh ăm mâu kế tơmeăm pêt ƀă ăm kuăn pơlê ôu kâ hum roh a mơ’nui rơnó tô.

Hlo tơdroăng kố, Vi ƀan hnê ngăn kong pơlê Dak Nông hiăng pơkâ túa hbrâ ví ƀă kong tô mơdrăng khăng khoăng, pơkâ thế mâu khu râ, kơvâ cheăng séa ngăn nhên ki ôh tá tơniăn dêi kong prâi, séa ngăn nhên mâu kơnhŏng têa, mơnhên kơpong ki rak tơniăn tŭm têa vâ tôh ăm tơmeăm khoăng, kơpong ki mơni kô ôh tá ai bê têa, hbrâ rơnáu xoăng têa tơtro ƀă pơkuâ rơnêu hâi khế ‘no têa, hơ’lêh hdrê pêt mơnăn păn ăm tơtro.